منگلورو:5؍مارچ  (ایس اؤ نیوز)شہر کی ایک پرائیویٹ انجنئیرنگ کالج میں سالِ اول کے متعلم پر  رینگنگ اور لکچرر پر حملہ کرنےکے الزام میں اسی  کالج کے چار طلبا کو گرفتارکرلیا گیا ہے، اس بات کی اطلاع   پولس کمشنر ششی کمار نے پریس کانفرنس کے ذریعے دی ہے۔

 پولس کمشنر نے بتایا کہ مُکّا شری نواس کالج میں انجنئیر نگ سالِ اول کے ایک متعلم کو ریگنگ کے ذریعے  تنگ و ہراساں کیا گیا تھا جس کے الزام میں  اسی کالج میں زیر تعلیم سال سوم کے انجنئیرنگ طلبا محمد بازیل ، کے یو شموئیل ، سنبھرم آلوا، اشوین جانسن کو   گرفتار کر لیا گیا  ہے۔

معاملے کو لےکر ریگنگ کا شکار  طالب علم نے پولس تھانےمیں شکایت درج کی تھی  جس کے بعد  کالج کے ڈین نے انہیں کالج سے معطل کردیا تھا۔ اسی دوران ان  طلبا  پر الزام ہے کہ انہوں نے نے کالج کے ایک لکچرر پر حملہ کرتےہوئے انہیں جان سے مارنے کی دھمکی  دی   ہے۔ طالب علم اور لکچرر کی طرف سے دی گئی الگ الگ شکایت پر پولس نے کیس درج کرلیاہے۔ پولس کمشنر نے بتایا کہ گرفتار شدہ طلبا کو عدالت میں پیش کیاجائےگا۔