چتردرگہ7/ اپریل (ایس او نیوز): بینگلور سے شموگہ ہوتے ہوئے گوکرن جانے کے لئے نکلی ہوئی پرائیویٹ بس ضلع چتردرگہ کے ہوللکیرے میں اُلٹ گئی جس کے نتیجے میں چار لوگ ہلاک ہوگئے۔ حادثہ اتوار صبح قریب چار بجےمضافاتی علاقہ انجنیا مندر کے قریب نیشنل ہائی وے ١٣ پر پیش آیا۔
ذرائع سے ملی اطلاع کے مطابق بس پر چالیس سے زائد مسافر سوار تھے، سڑک کی غیر سائٹیفک تعمیر کی وجہ سے تیز رفتار بس اُلٹ گئی ۔ حادثے میں 30 سے زائد مسافر زخمی ہوئے ہیں جس میں آٹھ کو شدید چوٹیں آئی ہیں۔ تمام زخمیوں کو ابتدا میں ہوللکیرے تعلقہ اسپتال لے جایا گیا تھا ، ابتدائی طبی امداد کے بعد بعض شدید زخمیوں کو چتردرگہ، بعض کو داونگیرے اوربعض کو شموگہ اسپتالوں میں منتقل کیا گیا ہے۔
حادثے کے بعد عینی شاہدین نے بتایا کہ سڑک کی غیر سائنٹیفک تعمیر کی وجہ سے یہ حادثہ پیش آیا ہے، مقامی لوگوں کے مطابق یہاں ایسا حادثہ پہلی بار نہیں ہوا ہے۔ اس طرح کے حادثات کئی بار ہوچکے ہیں مگر حکام سے شکایتیں کرنے کے باوجود حکام حادثات کی روک تھام کے لئے کسی طرح کی کاروائی نہیں کررہے ہیں۔
حادثے کے تعلق سے ہوللکیرے پولس اسٹیشن میں کیس درج کیا گیا ہے۔