کرناٹک میں’’ پرجول ریونّا ‘‘ کا اسکینڈل ملک کی سیاسی تاریخ کا سب سے بڑا جنسی اسکینڈل؛ وائرل ویڈیو زاور پین ڈرائیو کا چرچا
بنگلورو،30اپریل( ایس او نیوز /ایجنسی)پچھلے چار پانچ دنوں سے ریاست کرناٹک میں وائرل ویڈیو اور پین ڈرائیو کا چرچا ہے۔ میڈیا رپورٹوں کے مطابق بہت سے فحش ویڈیوز وہاٹس ایپ گروپس میں گردش کر رہے ہیں۔ یہ بھی کہا جاتا ہے کہ ایک پین ڈرائیو ہے جس میں ہزاروں ویڈیوز موجود ہیں۔ ریاستی حکومت نے معاملے کی جانچ ایس آئی ٹی کو سونپ دی ہے۔ ریاست میں پچھلے چار پانچ دنوں سے ایک ہی بحث ہو رہی ہے۔ جدھر دیکھو ایک ہی چیز ہے۔ سیلون شاپ، ہوٹل، میٹرو، ریلوے اسٹیشن، میجسٹک، بار، پلے گراؤنڈ۔ یہی وجہ ہے کہ کھیتوں میں بھی فحش ویڈیوز کا چرچا ہے۔
بتایا جاتا ہے کہ یہ فحش وڈیوز ہاسن کے ایم پی اور آنے والے لوک سبھا انتخابات کے جے ڈی ایس۔بی جے پی اُمیدوار پرجول ریونّا کی ہے جس پر الزام ہے کہ انہوں نے ہزاروں خواتین کے ساتھ جنسی ہراسانی کی ہے اور اُن کے وڈیوز بنائے ہیں ۔ کہا جاتا ہے کہ اس نے سیکڑوں خواتین کے ساتھ جنسی تعلقات قائم کیے تھے۔ ان ویڈیوز سے ہاسن کے سینکڑوں متاثرین کے بارے میں کہا جاتا ہے کہ وہ پریشانی میں مبتلا ہیں۔ اس لیے وائرل ہونے والی فحش ویڈیوز کے خلاف ناراض لوگ سڑکوں پر نکل آئے ہیں۔
اسے ملک کی سیاسی تاریخ کا سب سے بڑا جنسی اسکینڈل قرار دیا جارہا ہے۔ پراجول ریوانا کے ساتھ ان کے والد ایچ ڈی ریونا کے خلاف بھی شکایت درج کرائی گئی ہے۔
ریونا کے گھر پر کام کرنے والی متاثرہ لڑکی نے جب شکایت درج کرائی ہے تو نہ صرف کرناٹک بلکہ پورے ملک میں کھلبلی مچ گئی ۔ جس کے فوری بعد پرجول ریونّا ملک چھوڑ کر جرمنی فرار ہوگیا اور بیرون ملک سے قانونی جنگ شروع کر دی ۔
سابق وزیراعلیٰ ایچ ڈی کمارسوامی نے جے ڈی ایس سے ایم پی پرجول ریونا کو معطل کرنے کا اشارہ دیا ہے۔ اس بارے میں بات کرتے ہوئے انہوں نے کہا کہ پارٹی پرجول کے خلاف فیصلہ کن کارروائی کرے گی۔ جس نے بھی غلط کیا ہے اسے سزا ملنی چاہیے۔کماراسوامی نے کہا کہ ایس آئی ٹی تشکیل دی گئی ہے اس لئے تحقیقات کے ذریعے سچ سامنے آنے دیں۔
کمار سوامی نے سوال کرتے ہوئے کہا کہ پرجول کے فحش ویڈیو کیس میں فیملی کو کیوں گھسیٹا جارہا ہے ؟ دیوے گوڑااور میرا نام کیوں شامل کیاجارہا ہے؟ ۔ ایچ ڈی دیوے گوڑا اور میں خواتین کے ساتھ احترام کے ساتھ پیش آتے ہیں۔ مجھے پرجول کے بارے میں ابھی پتہ چلا، اگر مجھے پہلے معلوم ہوتا تو میں کارروائی کرتا۔ کمارسوامی نے کہا کہ فحش ویڈیو کیس سے نہ صرف خاندان بلکہ پورا سماج شرمندہ ہے۔