مینگلور میں ماہی گیری بوٹ، جہاز سے ٹکرا کر ڈوب گئی؛ تین ماہی گیر ہلاک، کئی لاپتہ ؛ بچاو اور راحت کا کام جاری
مینگلور 13/اپریل (ایس او نیوز) مینگلور کی بندرگاہ سے 43 ناوٹیکل میل دور بحر عرب سمندر میں ماہی گیروں کی ایک کشتی بڑی جہاز سے ٹکرانے کے نتیجے میں سمندر میں ڈوب گئی جس کے نتیجے میں تین ماہی گیروں کی موت واقع ہونےکی اطلاع ملی ہے۔ البتہ حادثے میں کئی ماہی گیر سمندر میں غرق ہوکرلاپتہ ہوگئے ہیں۔ پتہ چلا ہے کہ قریب پانچ ماہی گیروں کو ساحلی محافظ دستہ بچانے میں کامیاب ہوگیا ہے اور مزید ماہی گیروں کو بچانے کےلئے راحت اور بچاو رسانی کا کام جاری ہے۔
ذرائع سے ملی اطلاع کےمطابق پڑوسی ریاست کیرالہ کی ایک بوٹ جس پر 14 ماہی گیر سوار تھے، مینگلور سمندر میں مچھلیوں کا شکار کررہے تھے کہ اچانک ایک بڑی جہاز ان کی بوٹ سے ٹکراگئی۔ حادثہ منگل کی اولین ساعتوں میں پیش آیا۔ حادثے کے بعد انڈین کوسٹ گارڈس نے اپنی جہاز اور ائیرکرافٹ کے ذریعے بچاو کا کام شروع کردیا ہے۔
اطلاع کے مطابق سنگاپور کی MV APL LE Havare نامی جہاز ماہی گیری بوٹ سے ٹکراگئی تھی۔ پڑوسی ریاست کیرالہ کے کوزی کوڈ کے بیپورے کے رہنے والے جعفر کی 'Rabha' نامی ماہی گیری بوٹ اتوار کو مچھلیوں کے شکار کےلئے نکلی تھی۔ بوٹ پر تمل ناڈو سے تعلق رکھنے والے سات ماہی گیراور مغربی بنگال سے تعلق رکھنے والے سات ماہی گیر سوار تھے۔
اب تک ملی اطلاع کے مطابق جن پانچ لوگوں کو بچانے میں کامیابی ملی ہے، اُس میں دو کی شناخت مغربی بنگال کے رہنے والے سُنیل داس اور تمل ناڈو کے رہنے والے ویلو موروگن کی حیثیت سےکی گئی ہے۔
