مینگلور2/ستمبر(ایس او نیوز) قریبی علاقہ  پتور کے قریب میسورو۔مانی روڈ پر ایک خطرناک حادثہ پیش آیا جس میں ایک کار بے قابو ہوکرسڑک کنارے واقع ایک چھوٹے سے تالاب میں جاگری اور کار میں سوارایک ہی خاندان کے چار افراد ہلاک ہوگئے۔ حادثہ اتوار کی صبح قریب 7:30 بجے پیش آیا۔

 مہلوکین کی شناخت اشوک (48سال)، اس کی بیوی ہیم لتا، بیٹا یشاس اور بیٹی ورشا کے طور پر کی گئی ہے۔معلوم ہوا ہے کہ یہ چار افراد کی فیملی سوُنٹی کوپّا کی رہنے والی ہے۔ وہ لوگ منگلورو سے سوُنٹی کوپّا کی طرف جارہے تھے کہ اشوک  کے ہاتھ سے کار بے قابو ہوگئی اور سیدھے تالاب میں جاگری۔

حادثے کی اطلاع ملتے ہی سمپیا پولس اسٹیشن کے آفسران اور عملہ موقع پر پہنچا اور فائر بریگیڈ کے عملے کی مدد سے  کار کے اندر موجود لاشوں کو باہر نکالتے ہوئے پتور سرکاری اسپتال منتقل کیا۔

جائے واردات پر موجود عوام کا کہنا ہے کہ مین روڈ کے کنارے واقع یہ چھوٹا سا تالاب بہت ہی خطرناک ہے۔اس کی وجہ جان لیوا حادثوں کا خدشہ جتاکر ایک عرصے سے اس تالاب کو بند کردینے کی مانگ کی جاتی رہی ہے، مگر یہ تالاب چونکہ ایک شخص کی نجی ملکیت میں ہے اس لئے وہ اسے بند کرنے کی اجازت نہیں دے رہاتھا۔اس لئے متعلقہ محکمہ جاتی افسران اس پر توجہ نہیں دے رہے تھے۔ بالآخر عوام کا خدشہ صحیح ثابت ہوا اور بیک وقت چار افراد اس تالاب کی نذر ہوگئے۔