بھٹکل نیشنل ہائی وے عثمان نگر کراس پر انڈر پاس تعمیر کرنے کا مطالبہ ۔عوام کر رہے ہیں احتجاج کی تیاری
بھٹکل 21 ؍نومبر(ا یس او نیوز) بھٹکل شہر کے عثمان نگر سے بلال کھنڈ(گلمی ) ، ریلوے اسٹیشن اور اطراف واکناف میں جا نے کے لیے نیشنل ہائی وے پر جو کراس ہے وہ اس وقت عوام کے لیے بڑی مشکلات کا سبب بن گیا ہے کیونکہ ہائی وے کی توسیع کی وجہ سے تیز رفتار ٹریفک میں یہاں موٹر گاڑیوں کو موڑنا یا پیدل روڈکراس کر نا اپنی جان کو جوکھم میں ڈالنے جیسا ہو گیا ہے ۔ اس مسئلے کو حل کرنے کے لیے عوام مطالبہ کر رہے ہیں کہ اس مقام پر ایک انڈر پاس تعمیرکیا جا ئے ۔
جمعہ کے دن منعقدہ پریس کانفرنس سے خطاب کرتے ہوئے علاقے اور شہرکے ذمہ داران نے بتایاکہ نیشنل ہائی وے اتھاریٹی اور ضلع ڈپٹی کمشنرکے پاس اس سے پہلے کئی بارانڈر پاس تعمیر کرنےکا تحریری مطالبہ کیا جا چکا ہے اور حال ہی میں تعمیری کام دو بارہ شروع ہونے کے بعد بھی ڈپٹی کمشنر اور پولیس کے اعلیٰ افسران کو اس ضمن میں میمورنڈم دیا گیا ہے۔ لیکن ابھی تک اس پر توجہ نہیں دی گئی ہے اور سڑک کو پکا کرنے کا کام بڑی تیز رفتاری کے ساتھ جاری ہے۔ چونکہ اس مقام پر سڑک کی اونچائی چار فٹ سے زیادہ ہوگئی ہے اس لئے کراس روڈ جو ہے وہ بہت ہی نشیب میں چلا گیا ہے۔ جب سڑک کے بیچ ڈیوائڈر بنادیا جائے گا تو دو طرفہ ٹریفک اس مقام پر بہت ہی زیادہ تیز رفتار ہوجائے گی جس کی وجہ سے حادثات بڑھنے کے امکانا ت بہت زیادہ ہوگئے ہیں۔۔ ایسی صورت میں مرد وخواتین اور بچوں و بوڑھوں ہر ایک کے لئے مشکل ہی نہیں بلکہ خطرناک ہوجائےگا ۔ اس کے علاوہ موٹرگاڑیوں کو ریلوے اسٹیشن کی طرف جانے والی سڑک کے لئے لمبا چکر لگانا پڑے گا۔ اس سے آٹو رکشہ کا کرایہ بھی بہت زیادہ بڑھ جائے گا۔
ذمہ داران نے بتایا کہ چونکہ ضلع انتظامیہ اور پولیس محکمہ کی طرف سے اس سمت میں کوئی مثبت رد عمل نہیں مل رہا ہے اور تعلقہ کے عوام کو اس مشکل سے راحت دلانے کے لئے انڈر پاس تعمیر کرنے کی بات پر توجہ نہیں دی جارہی ہے بلکہ ہائی وے کا تعمیری کام معمول کے مطابق آگے بڑھا یا جارہا ہے، اس لئے تعلقہ کے عوامی ذمہ داران محسوس کررہے ہیں کہ اپنا مطالبہ منوانے کے لئے ایک بہت بڑا احتجاج کرنا ضروری ہوگیا ہے۔ فی الحال عوام کی طرف سے متعلقہ علاقے کے ذمہ داران ہی انتظامیہ اور پولیس افسران کے سامنے آکر میمورنڈم دے رہے ہیں ، لیکن اگر اس مانگ کو پورانہیں کیا گیا تو پھر پورے تعلقہ کے عوام متحد ہوکر احتجاج پر اتر آئیں گے ۔
پریس کانفرنس میں محتشم احمد صائب،کانگریس اقلیتی مورچہ کے صدر عبدالمجید، نامدھاری سماج کے لیڈر ستیش نائک، مٹھلی گرام پنچایت کے سابق نائب صدر گنپتی نائک اور دیگر افراد موجود تھے۔