منگلورو ایئر پورٹ نجی کاری کاابھی فیصلہ نہیں ہوا۔ مرکزی وزیرشہری ہوابازی سریش پربھو کا بیان
منگلورو16؍اپریل (ایس او نیوز) مرکزی وزیر برائے کامرس، صنعت اور شہری ہوابازی سریش پربھو کے بیان کے مطابق منگلورو انٹرنیشنل ایئر پورٹ ٹھیکے پر دینے کے سلسلے میں ابھی کوئی فیصلہ نہیں ہوا ہے۔خیال رہے کہ پچھلے دنوں منگلورو ایئر پورٹ کا ٹھیکہ آڈانی گروپ کو دئے جانے کی بات میڈیا میں عام ہوگئی تھی۔
سریش پربھو نے کہا ملک میں ابھی مزید 100ہوائی اڈے تعمیر کیے جارہے ہیں۔ہوائی سفر کو اور زیادہ جدید زمانے کے تقاضوں کے ساتھ ہم آہنگ کرنے کا مطالبہ ہورہا ہے۔
الیکشن کے نتائج کے سلسلے میں انہوں نے کہاکہ میں نے انتخابی تشہیر کے لئے ملک کے مختلف مقامات کا دورہ کیا ہے۔ ہر جگہ مودی حکومت کے تعمیری منصوبوں اور فائدہ مند اسکیموں کی وجہ سے بی جے پی کی پوزیشن مضبوط ہے۔گزشتہ پانچ برسوں میں مودی حکومت کی طرف سے مرحلہ وار ترقیاتی کام انجام دئے گئے ہیں۔اس لئے نریندرا مودی کا پھر سے وزیر اعظم بننا یقینی ہے۔