مینگلور: کورونا کا پھر زبردست اچھال، 196کیس نکلے پوزیٹیو۔ اڈپی میں 41نئے معاملات؛ دونوں اضلاع میں 6 کی موت
منگلورو 12/جولائی (ایس او نیوز)آج بھی جنوبی کینرا میں کورونا نے اپنا قہر ڈھایا جس کے نتیجے میں ایک ہی دن میں 196معاملے پوزیٹیو نکلے ہیں۔جبکہ ایک ہی دن میں 5افرادموت کا شکار ہوگئے جس کے ساتھ ضلع میں مرنے والوں کی تعداد46ہوگئی ہے۔
آج اتوار کی شام کو جاری کیے گئے ہیلتھ بلیٹین کے مطابق جن لوگوں کی رپورٹ پوزیٹیو آئی ہے ان میں صرف الال سے 18متاثرین شامل ہیں۔ پورے جنوبی کینرا میں اس وقت 2,230 لوگ پوزیٹیو ہیں اوراب تک 876مریض صحت یاب ہوکر اسپتالوں سے ڈسچارج ہوچکے ہیں۔ آج ایک ہی دن میں 94مریضوں کو صحت یاب ہونے پر اسپتال سے چھٹی دے دی گئی ہے۔
اڈپی سے ملی ہیلتھ بلیٹین کی رپورٹ کے مطابق آج یہاں پر 41 تازہ معاملے سامنے آئے ہیں۔ضلع میں اب تک 1,608پوزیٹیو کیسس ہوئے ہیں جن میں سے 1,273مریض صحت یاب ہوکر گھروں کو لوٹ چکے ہیں۔آج یہاں کوروناسے ایک شخص کی موت واقع ہوئی جس کے ساتھ اب تک مرنے والوں کی تعداد4ہوگئی۔
آج جو تازہ پوزیٹیو معاملے سامنے آئے ہیں ان میں ممبئی اور ریاست کے دوسرے اضلاع سے لوٹنے والوں کے علاوہ سعودی عربیہ سے آنے والے اور دوسرے کووِڈ مریضوں سے رابطے میں آنے والے افراد شامل ہیں۔ان میں 26اڈپی تعلقہ اور 11کنداپور تعلقہ کے باشندے ہیں۔