مینگلور 13/اپریل (ایس او نیوز) کورونا کی دوسری لہر  شروع ہونے کے  بعد مینگلور میں جاری رات کے کرفیو پر سختی کے ساتھ   عمل کیا جارہا ہے  اور کسی بھی سواری کو غیر ضروری طور پر سڑک پر گذرنے کے دوران اُن کے خلاف کیسس دائر کئے جارہےہیں۔  پتہ چلا ہے کہ سنیچر  کو ایک ہی رات کرفیو کی خلاف ورزی کرنے کی پاداش میں  پولس نے 65 سواریوں کے مالکان کے خلاف کیسس دائر کئے تھے جبکہ اگلے روز یعنی اتوار کو پھر 13 سواری مالکان کے خلاف معاملات درج کئے گئے، اس طرح صرف دو دنوں کے اندر اب تک 78 سواری مالکان کے خلاف کیسس درج کئے  گئے ہیں۔

اخبار نویسوں کو معلومات فراہم کرتےہوئے مینگلور سٹی پولس کمشنر ششی کمار نے بتایا کہ  رات کے کرفیو کو لے کر عوام کی طرف سے مکمل تعاون مل رہا ہے، لیکن رات دس بجے کے بعد کرفیو ہونے پر  دکانداروں اور ہوٹل والوں کو چاہئے کہ وہ  دس بجنے کے پندہ ، بیس منٹ پہلے ہی اپنا کاروبار بند کریں تاکہ  اُن کے ملازمین  دس بجنے سےپہلے ہی اپنے  اپنے  گھرپہنچ سکیں۔

کمشنر نے بتایا کہ  کرفیو پر سختی سے عمل کرنے کےلئے مینگلور سٹی کارپوریشن حدود میں 49 اور دیگر علاقوں میں چار اس طرح جملہ  53 چیک پوسٹ  قائم کئے  گئےہیں جہاں سواریوں کو روکنے اور جانچ کرنے کا کام جاری ہے۔