بھٹکل:30؍اگست (ایس اؤ نیوز)جالی پٹن پنچایت حدود کے کارگیدے علاقے میں تعمیر کیا گیا سیمنٹ روڈ بارش کی وجہ سے اکھڑ گیا ہے، مقامی عوام نے فوری طورپر سڑک کی درستگی  کامطالبہ کیا ہے۔

کارگیدےمیں عوامی سہولت کے لئے 15لاکھ روپئے کی لاگت سے 1.5کلومیٹر کی سیمنٹ روڈ تعمیر کی گئی تھی۔ اس سے قبل لاکھوں روپئے کی لاگت سے اندرونی نالیوں کے مین ہول کا کام کیاگیا تھا۔ سڑک تعمیر کرنے کے صرف تین مہینوں میں ہی   پوری  سڑک برباد ہوگئی ہے ، سڑک پر چلنا بھی دشوار ہوگیا ہے۔ علاقے میں 40-45گھر ہیں ،پچھلے ایک ہفتہ سے آپسی ربط بھی ٹوٹ جانے سے ایسالگتا ہے کہ کارگیدے کے لوگوں کی گھیرا بندی کی گئی ہو، علاقے کے لوگوں کو اسپتال جانا بھی ممکن نہیں ہوپارہاہے۔عوام نے  سڑک کی بربادی کےلئے غیر معیاری کام اور اندرونی نالیوں کےکام کو ذمہ دار بتاتے ہوئےمتعلقہ کاموں میں لاکھوں روپیوں کی رشوت خوری ہونے کا الزام لگایا ہے۔عوام نے اس بات پر بھی سخت ناراضگی ظاہر کی ہے کہ  روڈ خستہ ہوکر کئی دن ہوچکے ہیں لیکن  ابھی تک کسی آفیسر  نے جائے وقوع پر پہنچ کر  درستگی کی طرف توجہ نہیں دی ہے۔ 

اس موقع پر وکیل دتاتریہ نائک نے بات کرتےہوئےکہاکہ سڑک کی بربادی بتا رہی ہے کہ عوامی حقوق کی خلاف ورزی کی گئی ہے۔ اگلے ایک ہفتہ میں سڑک کی مرمت کی جائے اور جس کانٹراکٹر نے سڑک کی تعمیر کی ہے اس کے خلاف کارروائی کی جائے۔ اگر ایسا نہیں ہوا تو پٹن پنچایت افسران کے خلاف عدالت میں کریمنل مقدمہ درج کیا جائے گا ۔ احتجاج میں مقامی سطح پر سکرپا نائک، روی نائک، شری دھر نائک، منجوناتھ نائک وغیرہ موجود تھے۔