بھٹکل میں موسلادھار بارش؛ بندر روڈ پر کمپاونڈ کی دیوار گر گئی؛ بائک کو نقصان؛ بارش سے دو بجلی کے کھمبوں پر بھی درخت گرگئے
بھٹکل 26/جون (ایس او نیوز) شہر میں گذشتہ کچھ دنوں سے بارش کا سلسلہ جاری ہے، البتہ منگل اور بدھ کی درمیانی شب سے آج بدھ شام تک کافی اچھی بارش ریکارڈ کی گئی ہے، ایسے میں شام کو ایک مکان کے کمپاونڈ کی دیوار گرنے کی واردات بھی پیش آئی ہے۔ ایسے میں محکمہ ہیسکام نے بھٹکل کے مضافات میں بجلی کے دو کھمبوں پر تناور درخت گرنے سے دونوں کھمبے ٹوٹنے کی اطلاع دی ہے۔
اطلاع کے مطابق شہر کے بندر روڈ ففتھ کراس کے قریب واقع ایک مکان کی کمپاونڈ کی دیوار گرنے سے قریب میں پارک کی ہوئی ایک بائک اور ایک سائکل کو شدید نقصان پہنچا ہے۔
بتایا گیا ہے کہ قریب میں واقع ایک سوئمنگ پول میں کافی لڑکے تیراکی کررہے تھے ، مگر اچھا ہوا کہ دیوار سوئمنگ پول کی طرف نہیں گری بلکہ مخالف سمت کی طرف گری جس سے کسی کو کچھ نقصان نہیں پہنچا ، اگر خدانخواستہ دیوار سوئمنگ پول کی طرف گرتی تو بڑا حادثہ ہوسکتا تھا ۔ اطلاع کے مطابق متعلقہ بائک اور سائکل تیراکی کرنے آئے لڑکوں کی بتائی گئی ہے جو دیوار کے قریب پارک کی گئی تھی۔
محکمہ ہیسکام کے مطابق بدھ شام قریب آٹھ بجے بھٹکل کے مضافاتی علاقہ کوپّا ، جنگلاتی علاقہ میں ایک تناور درخت 11 کے وی بجلی کے کھمبوں پر گرنے سے دونوں کھمبے ٹوٹ گر گئے جس سے کچھ دیر کے لئے متعلقہ علاقہ میں بجلی سپلائی بند ہوگئی، مگر ہیسکام کے اہلکاروں نے فوری طور پر جائے وقوع پر پہنچ کر ضروری کاروائی کی۔
محکمہ موسمیات کے مطابق بھٹکل میں کل منگل صبح آٹھ بجے سے آج بدھ صبح آٹھ بجے تک 62.4 ایم ایم بارش ریکارڈ کی گئی ہے۔