منگلورو،13/جولائی (ایس او نیوز) جنوبی کینرا میں 16جولائی سے ایک ہفتے تک کے لئے مکمل لاک ڈاؤن کا اعلان کردیا گیا ہے۔ ویڈیو مسیج کے ذریعے ضلع انچارج وزیر کوٹا سرینواس پجاری نے کہا ”ہم نے وزیر اعلیٰ ایڈی یورپا اوردیگر افسران سے بات چیت کی اور ان کے سامنے ضلع میں پھیل رہی کورونا وباء کے سلسلے میں اہم باتیں رکھیں۔اس وقت یہاں لاک ڈاؤن کرنے کی ضرورت ہے اس لئے عوام کے مفاد کو سامنے رکھتے ہوئے ضلع انتظامیہ اور منتخب عوامی نمائندوں نے مل کر یہ فیصلہ لیا ہے۔“

وزیر موصوف نے کہاکہ کورونا کو پھیلنے سے روکنا اسی وقت ممکن ے جب لاک ڈاؤن کو پوری طرح سختی کے ساتھ لاگو کیاجائے گا۔ اس لئے میں جنوبی کینرا کے عوام سے اپیل کرتا ہوں کہ بدھ کی شام تک اپنے لیے ضروری سامان خرید لیں۔اسکے بعد جمعرات سے ایک ہفتے کا مکمل لاک داؤن لاگو ہوجائے گا۔ اس کے لئے رہنما ہدایات جلد ہی جاری کی جائیں گی۔عوام کو اس سلسلے میں بھرپورتعاون کرنا ہوگا اور لاک ڈاؤن قوانین کی پوری طرح پابندی کرنی ہوگی۔