سرسی 7/ فروری (ایس او نیوز) سرسی تعلقہ کے سوگامی پرائمری ہیلتھ سینٹر میں سرکاری طور پر آنکھوں کی جانچ کے لئے کیمپ کا انعقاد کیا گیا تھا  مگر وہاں کی بد نظمی سے پریشان مریضوں کو درختوں کے سایے میں انتظار کی دقت سے گزرنا پڑا ۔ 

ذرائع سے ملی اطلاع کے مطابق     سوگامی پرائمری ہیلتھ سینٹر میں  6، 7 اور 8 فروری کو کیمپ  منعقد ہو گیا ہے، پہلے دن  6 فروری کو  اس کیمپ میں آنکھوں کی جانچ کے لئے آنے والے مریضوں میں زیادہ تر عمر رسیدہ شامل تھے  مگر  ان کے بیٹھنے اور انتظار کرنے کے لئے  نشستوں کا انتظام نہیں کیا گیا تھا یہاں تک کے پینے کا پانی بھی فراہم نہیں کیا گیا تھا ۔ اس وجہ سے ان لوگوں کو قریب میں واقع جنگلاتی علاقے میں درختوں کے نیچے بیٹھ کر اپنی باری کا  انتظار کرنا پڑا ۔ 

    اس ضمن میں جب تعلقہ ہیلتھ آفیسر سے شکایت کی گئی تو انہوں نے بتایا کہ ڈاکٹروں کی قلت ہے ۔ صرف ایک ڈاکٹر کے ذریعے جانچ کی جا رہی ہے ۔ ہم نے مریضوں کو ممکنہ سہولتیں پہنچانے کی پوری کوشش کی ہے ۔ جبکہ مریضوں  کا کہنا تھا کہ مناسب انتظامات کے بغیر اس طرح کے کیمپ منعقد نہیں کرنا چاہیے ۔ سرکاری کیمپ کا مطلب یہ نہیں ہے کہ اس طرح کی بد نظمی اور افراتفری کے ساتھ اس کا انعقاد کیا جائے ۔ 

    معلوم ہوا ہے کہ اس کیمپ میں صرف ایک ہی ڈاکٹر نے ایک دن میں 135 لوگوں کی جانچ کی ۔لوگوں نے شکایتی انداز میں بتایا کہ  اسی سے  آپ اندازہ لگائیں کہ کتنے منٹ میں اور کس حد تک ایک مریض کی جانچ کی گئی ہوگی ۔