بی جے پی کی ٹکٹ دلانے کے نام پر185کروڑ کا لین دین؛چیترا کے ساتھ آر ایس ایس کے 9 کارکن ملوث؛ کانگریس
بنگلورو،20؍ستمبر (ایس او نیوز) دھوکہ دہی کے معاملہ میں حراست میں لی گئی چئیترا کندا پور نے17 سے زائد لوگوں کو دھوکہ دیا ہے۔ اس نے 23 لوگوں کو ٹکٹ دلانے کا جھانسہ دیتے ہوئے اُن سے پیسے لیے۔ ٹکٹنگ کے اس کاروبار میں 40 لوگ ملوث ہیں۔ پارٹی کا ٹکٹ دلانے کے جھانسہ کے ذریعہ 185 کروڑ روپے کا لین دین کیا گیا ہے ۔ اس بات کا الزام کرناٹکا پردیش کانگریس کمیٹی (کے پی سی سی) کے ترجمان ایم لکشمن نے لگایا۔
میسوروکانگریس بھون میں پریس کانفرنس سے خطاب کرتے ہوئے انہوں نے کہا کہ 9 لوگوں کی ٹیم نے دھوکہ دیا ہے۔ یہ سب بی جے پی اور آر ایس ایس کے کارکن ہیں۔ آنے والے دودنوں کے اندر پتہ چل جائے گا کہ چئیترا کندا پور کو ملنے والی رقم کس کس کو دی گئی ہے؟
چئیترا کنداپور کا سابق وزیر اعلیٰ بسواراج بومئی اورارگا گیا نیندر سے براہ راست تعلق ہے۔ سی ٹی روی، بی ایس ایڈی یورپا اورچکرورتی سولیبیلے کے ساتھ اس کا کیا تعلق ہے، اس کی وضاحت ہونی چاہیے۔
انہوں نے کہا کہ اس بات کی تحقیقات ہونی چاہئے کہ آیا چئیترا کا پی ایس آئی گھوٹالہ سے بھی کوئی تعلق ہے یا نہیں۔ انہوں نے بتایا کہ پی ایس آئی گھوٹالے اور چار سے زیادہ گھوٹالے میں چیتئرا کے ملوث ہونے کی اطلاعات ہیں۔ انہوں نے یہ بھی بتایا کہ چئیترا کے جیل میں بھی کچھ لوگوں سے رابطے ہیں۔
لکشمن نے ایک سوال کا جواب دیتے ہوئے کہا کہ ہماری حکومت اس کی ایماندارانہ تحقیقات کرے گی۔ لکشمن نے کہا کہ میسوروعلاقہ کے دوسیاستدانوں نے چئیترا کے ذریعہ پیسہ دیکر بی جے پی ٹکٹ حاصل کئے ہیں۔ وہ دونوں سیاستدان میسورو دیہی علاقہ سے تعلق رکھتے ہیں عنقریب ان تمام کے ناموں کو منظرعام پرلایا جائے گا۔
میسورو ضلع کانگریس صدروجئے کمارنے کہا کہ چئیترا ا کنداپور کے بیان کی بنیاد پر چکرورتی سولیبیلے اور ارگا گیا نیندرا کو بھی گرفتار کیا جانا چاہیے۔
پی ایس آئی بھرتی اسکینڈل اور چانسلربھرتی اسکینڈل کواس کے دائرہ کارمیں لایا جائے۔ بی جے پی حکومت کے دورمیں لوک سیوا کمیشن کے ارکان کی تقرری میں بھی بے قاعدگی ہوئی ہے۔ تحقیقات کی جائیں تو بڑا اسکینڈل سامنے آسکتا ہے۔ ہم اس تعلق سے وزیر اعلیٰ سے ملاقات کرکے اس معاملہ کی ریٹائرڈ جج کے ذریعے تحقیقات کرانے کا مطالبہ کریں گے۔
پریس کانفرنس میں میسورو کے کانگریس صدرمورتی ، ضلع پنچایت کے سابق صدر بی ایم رامو، کے مہیش و دیگرموجود تھے۔