ڈانڈیلی 23/اکتوبر (ایس او نیوز) ضلع شمالی کینرا کے رکن پارلیمان اننت کمار ہیگڈے نے یہاں ایک پریس کانفرنس کے دوران کہا کہ ضلع کی تقسیم کا موضوع فی الحال قابل عمل بات نہیں ہے۔  انہوں نے کہا کہ کسی بھی مسئلے کو صرف سیاسی نقطہ نظر سے دیکھنا اور اسی طرز پر طے کرنا صحیح طریقہ نہیں ہوتا۔ ایسے مسائل کے مختلف پہلوؤں پر غور کرنا اور اس کے عملی امکانات کا جائزہ لینا ضروری ہوتا ہے۔اس لئے موجودہ حالات میں ضلع کی تقسیم کی تجویز پر عمل کرنا ممکن نہیں ہے۔

اننت کمار ہیگڈے نے مزید یہ بھی بتایا کہ ڈانڈیلی اورالناور کے درمیان پاسنجر ٹرین چند ہی دنوں میں شروع کی جائے گی۔ اس علاقے کے لوگوں کے لئے مرکزی حکومت کی طرف سے یہ ایک تحفہ ہے۔ گزشتہ دو دہائیوں سے رکی ہوئی اس ٹرین سروس کو اصل میں اکتوبر سے ہی شروع کیاجانا چاہیے تھا، مگر کچھ کام ابھی مکمل نہ ہونے کی وجہ سے آئندہ مہینے میں اسے شروع کیے جانے کے پورے امکانات ہیں۔ اس موع پر مرکزی وزیر ریلوے سریش انگڈی اس کا افتتاح کرنے کے لئے یہاں پہنچ رہے ہیں اور رکن اسمبلی آر وی دیشپانڈے کو بھی مدعو کیا جائے گا۔