بھٹکل : اربن کوآپریٹیو بینک کا سالانہ جلسہ ؛ کیا دس ہزار روپئے پرسنل لون دینے کی بھی پوزیشن میں نہیں ہے بینک ؟
بھٹکل:26؍ ستمبر(ایس اؤ نیوز)ضلع کا مشہور بھٹکل اربن کوآپریٹیو بینک کا سالانہ جلسہ سنیچر کو بینک کے صدر جعفر صادق شاہ بندری کی صدارت میں منعقد ہوا جس میں بینک کی رپورٹ پیش کرتے ہوئے جعفر صادق نے بتایا کہ رواں مالی سال میں بینک نے اپنے لین دین کے ذریعے 7.34کروڑ روپئے کا منافع کمایاہے۔ اس موقع پر بینک کے شئیر ہولڈر اور معروف سماجی کارکن عنایت اللہ شا ہ بندری نے سوال کیا کہ بینک کو اگر اتنا بڑا منافع ہوا ہے تو کیا وجہ ہے کہ بینک دس ہزار روپئے پرسنل لون دینے کی پوزیشن میں بھی نہیں ہے ؟ عنایت اللہ شاہ بندری کے مطابق بینک نے قریب تین سو لوگوں کو صرف دو لوگوں کی ضمانت پر پانچ پانچ لاکھ روپئے لون فراہم کیا ہے اور فراہم کیا گیا لون واپس حاصل کرنے میں ناکام ہے، جس کی وجہ سے انہیں خبر ملی ہے کہ ریزرو بینک نے ہدایت جاری کی ہے کہ جب تک فراہم کیا گیا لون واپس حاصل نہیں ہوتا، اُس وقت تک بینک دس ہزار روپیہ بھی پرسنل لون نہیں دے سکتا۔ عنایت اللہ شاہ بندری نے الزام لگایا کہ بینک کے کئی ڈائرکٹرس نے خود اپنی گیارنٹی پر لوگوں کو پانچ پانچ لاکھ روپیہ پرسنل لون دیا ہے ، اوربینک وہ رقم واپس حاصل کرنے میں ناکام ثابت ہورہے ہیں، جس کی وجہ سے غریب عوام دس ہزار روپیہ پرسنل لون بھی حاصل کرنے سے محروم ہوگئے ہیں۔ انہوں نے مشورہ دیا کہ اگر بینک اسٹاف کی نا اہلی یا غیر ذمہ داری کی وجہ سے ایسا ہوا ہے تو بینک کے اسٹاف کی تنخواہ میں 20 فیصد کٹوتی کی جانی چاہئے۔ انہوں نے اس بات کا بھی مشورہ دیا کہ جن لوگوں کو بینک کے ڈائرکٹرس نے اپنی گیارنٹی پر لون دیا ہے، وہ ڈائرکٹرس خود بھی اُن لوگوں سے رابطہ کرکے دئے گئے لون کو واپس حاصل کرنے کی کوشش کریں۔
جلسہ میں دیگر شئیر ہولڈرس شکیل مُلا، شری کانت نائک اور اے ایم مُلّا نے بھی اپنے اپنے تاثرات پیش کئے۔
بینک مینجر وسنت شاستری نے جواب دیتے ہوئے کہا کہ لون واپس حاصل کرنے کی شرح کم ہونے کی وجہ سے ریزروبینک نےمزید پرسنل لون نہ دینے کی ہدایت دی ہے اور ہمیں ریزرو بینک کی طرف سے ملنے والی ہدایات پر عمل کرنا ضروری ہوتا ہے۔مزید بتایا کہ اب بینک کی طرف سے پرسنل لون دینے کا سلسلہ روک دیا گیا ہے اور لون کی Recovery کے لئے کوششیں ہورہی ہیں۔
اس سے قبل بینک کے صدر جعفر صادق شاہ بندری نے بتایا کہ 31مارچ 2022کو ختم ہونے والے مالی سال میں بھٹکل کے مشہور بھٹکل اربن کو آپریٹیو بینک کا شئیر کیپٹل 15.12کروڑروپئےہےاوربینک کے 26779 شئیر ہولڈرس ہیں ۔ جب کہ بینک میں جمع شدہ فنڈ گذشتہ سال کے 58.78 کروڑروپیوں سے بڑھ کر 65 کروڑ روپئے ہوگیا ہے۔ مالی سال 2021-22 میں بینک کا کل ڈپازٹ 500.72 کروڑروپئے ہے تو رواں سال کل 283.22 کروڑ روپئے کا سرمایہ لگایاگیا ہے جب کہ 249.41 کروڑروپئے کا قرض دیاگیا ہے۔ جس میں 55.09 فی صد یعنی 149.36کروڑ روپئے کا قرض ترجیحی میدان کو دیاگیا ہے۔ رپورٹ میں انہوں نے بتایا کہ ترجیحی میدان میں 40.50 کروڑ روپئے کمزور طبقات کو دیاگیا ہے۔ مزید بتایا کہ کورونا کی وجہ سے اپنے قرضوں کی بھرپائی نہ کرنےوالے قرض داروں کو غیر منافع بخش جائیداد میں منتقل کیاگیا جس کے نتیجےمیں بینک کی غیر منافع جائیداد کی شرح 16.78 ہوگئی ہے۔ بینک صدر کے مطابق رواں مالی سال میں بینک نے اپنے لین دین کے ذریعے 7.34کروڑ روپئے کا منافع کمایاہے تو بینک کےقرضوں کی وصولیابی کی شرح کم ہونےکی وجہ سے منافع میں سے 1.84کروڑروپئے قرض فنڈ میں شمارکیاگیا ہے۔ اس کے علاوہ کاروباری اسٹاک بروکنگ لمیٹیڈ کمرشیل پیپر میں لگائے گئےسرمائے کی وصولیابی نہ ہونے پر بینک کے منافع میں سے 5.46کروڑروپئے الگ سے رکھےگئے ہیں۔ اس طرح اپنے تمام اخراجات کو ادا کرنےکے بعد بینک کا کل منافع 48.47لاکھ روپئے ہوا ہے۔
بینک کے نائب صدر ایم آر نائک، ڈائرکٹر ماستی موگیر، امتیاز، محمد زبیر، ایڈوکیٹ وکٹر گومس ، سائمن ڈیسوزا، سنتوش گونڈا، تلسی داس موگیر، پروین بابی ملا، سندھیاپربھو، لبنہ ایچ ایس، بال چندرراؤ ، ایڈوکیٹ ایس ایم خان، وغیرہ ڈائس پر موجود تھے۔ ڈائرکٹر شری دھر نائک نے شکریہ اداکیا ، بینک کے جنرل مینجر وسنت شاستری نے نظامت کی۔
