بھٹکل مدینہ کالونی کے ایک مکان میں چوری کی کوشش؛ دروازہ توڑ کر اندر داخل ہونے میں چور کامیاب؛ مگر لوٹنا پڑا خالی ہاتھ
بھٹکل:13؍فروری (ایس او نیوز) شہر کے مدینہ کالونی میں ایک مکان کا دروازہ توڑ کر چور گھر کے اندر داخل ہونے میں کامیاب ہوگئے، مگر گھر میں زیورات اور نقد رقم تک رسائی نہ ہونے سے اُنہیں ناکام واپس لوٹنا پڑا۔ چوری کی کوشش کا یہ واقعہ آج بدھ صبح اُس وقت منظر عام پر آیا جب گھر مالک عثمان ائیکری گھر واپس لوٹا۔
بتایا گیا ہے کہ گھر والے منگل شام کو گھر پر تالہ لگا کر اپنے رشتہ دار کے ہاں چلے گئے تھے، جب واپس لوٹے تو گھر کا دروازہ ٹوٹا ہوا تھا اور اندر سامان بکھرا پڑا تھا۔ گھر میں چونکہ زیورات اور نقد رقم وغیرہ قیمتی چیزیں نہیں تھیں، اس لئے چوروں کو مایوس لوٹنا پڑا۔
بتایا گیا ہے کہ ایک سال قبل بھی اسی گھر میں چوری کی کوشش کی گئی تھی، اب دوسری مرتبہ پھر کوشش کی گئی ہے۔
واردات کی اطلاع ملتے ہی بھٹکل پولس کے اہلکار جائے وقوع پر پہنچے اور جائزہ لیا۔ پولس کو تعجب اس بات پر ہے کہ منگل شام کو ہی گھر کے لوگ تالہ لگا کر باہر گئے تھے اور اسی رات چورگھر کے اندر داخؒل ہوئے ہیں اور چوری کی کوشش کی ہے۔
پولس معاملے کی چھان بین کررہی ہے۔
