بھٹکل ٹاون پولیس اسٹیشن کا درجہ بڑھا کر پولیس انسپکٹر اسٹیشن کردیا گیا
بھٹکل، 21؍ مارچ (ایس او نیوز) سرکاری حکم کے مطابق بھٹکل ٹاون پولیس اسٹیشن کا درجہ بڑھا دیا گیا ہے اوراسے پولیس انسپکٹر اسٹیشن میں تبدیل کردیا گیا ہے۔
خیال رہے کہ اس سے پہلے جالی گرام پنچایت کو ترقی دے کر ٹاون پنچایت میں تبدیل کیا گیا تھا جس کے بعد جالی پٹن پنچایت کا علاقہ بھٹکل ٹاون پولیس اسٹیشن کے حدود میں شامل ہوگیا تھا۔ اس طرح شہری آبادی بڑھ جانے کے بعد پولیس اسٹیشن کے درجہ میں بھی اضافہ کیا گیا ہے۔
ابھی تک ٹاون پولیس اسٹیشن کے طور پر کام کرنے والے اس تھانے میں فی الحال تین سب انسپکٹر اور 70اہلکار موجود ہیں ۔ اس کےعلاوہ ایک سرکل انسپکٹر ہے۔ جس کے دائرہ اختیار میں بھٹکل دیہی پولیس اسٹیشن کے علاوہ مرڈیشور اور منکی پولیس اسٹیشن آتے ہیں۔ اب بھٹکل پولیس اسٹیشن کے لئے انسپکٹر تعینات کیے جانے کے بعد موجودہ سرکل پولیس انسپکٹر کو بھٹکل ٹاون پولیس اسٹیشن کی ذمہ داریوں سے آزاد کیا جائے گا۔ کیونکہ ٹاون کے حدود میں آنے والے تمام معاملات اب انسپکٹر کے دائرہ اختیار میں آئیں گے۔ اس لیے پولیس تھانے میں عملہ کی تعداد بھی اضافہ کیا جائے گا۔