بھٹکل میں سنگین رخ اختیار کرتا آدھار کارڈ مسئلہ: رجسٹریشن کی بدنظمی کو لےکر عوام کا سخت اعتراض ’کوئی سننے والا نہیں ‘
بھٹکل:29؍جولائی (ایس اؤ نیوز) کئی ایک سرکاری اسکیموں ، منصوبوں اور طلبا کی انکم سرٹیفکٹ کے لئے آدھار کارڈ لازمی قرار دینے سے دن بدن آدھار کارڈ کی مانگ میں اضافہ ہو کر سنگین صورت حال اختیار کررہاہے، جہاں دیکھو وہاں ہرایک آدھار کارڈ کے پیچھے ہی لگاہواہے،اسی کے ساتھ ساتھ آدھار کارڈ میں ترمیم کا معاملہ بھی آگے نہیں بڑھ رہاہے، پوسٹ آفیس اور اٹل جی جن سنہی مرکز کے سامنے آدھار کارڈ کے لئے عوام کی لمبی لمبی قطاریں دیکھی جارہی ہیں، عوام بھوکے پیاسے کھڑے رہتےہیں، لیکن کیاکریں ان کا کوئی پرسان حال نہیں ہے۔
اس سے قبل گرام پنچایت، جن شری دفتر، تعلقہ دفتر سمیت مختلف علاقوں میں نئے آدھارکارڈ بنانے کا آرڈر جاری کیاگیا تھا، اس کے بعد سرکاراپنا آرڈر واپس لینے سے آدھار کا رجسٹریشن تکلیف دہ کام ہوگیاہے۔ فی الحال تعلقہ کی پوسٹ آفس اور جن شری مرکز کے سوا کہیں بھی آدھار رجسٹریشن نہیں ہوتاہے، دودراز دیہات سے عوام اپنے ضروری اور اہم کاموں کو چھوڑکر آدھار بنانے /ترمیمات کے لئے تعلقہ کو آتے ہیں ، مگر یومیہ صرف 40افراد کا ہی کارڈ بنانے یا ترمیمات کا موقع پوسٹ آفس میں دیاگیا ہے جس کے لئے عوام صبح 4بجے سےہی کوپن کے لئے کھانا پینا چھوڑکر کھڑے رہتےہیں۔ اگر چھوٹے بچوں کا کارڈ بنانا ہے تو اور بھی مشکل۔ والدین کے ساتھ چھوٹے چھوٹےبچے بھی مرکز کے سامنے رات گزارنے پر مجبورہیں۔ کوپن کے لئے قطاروں میں کھڑے عوام انتظامیہ طبقہ پرملامت کرتے سنے گئے۔ عوام کا مطالبہ ہے کہ اس سلسلے میں افسران مناسب قدم اٹھاتےہوئے مسائل کو حل کریں۔
بھٹکل کا دورہ کئے ضلع ڈی سی ہریش کمار کے روبرو عوام نے آدھار مسئلہ کو پیش کیاتو انہوں نے وضاحت کی کہ ریاست بھرمیں آدھار کا مسئلہ ہے، اس سلسلےمیں حکومت کو رپورٹ ارسال کرتےہوئے گرام پنچایت حدود میں آدھار کے رجسٹریشن کے لئے کوشش کئے جانےکا تیقن دیا۔
آدھار کارڈ رجسٹریشن کے لئے بھٹکل پہنچے ہیرور کے ناگیندر نائک نے مسئلہ کو پیش کرتے ہوئے کہاکہ میں صبح 5بجے سے یہاں انتظار میں ہوں، کچھ لوگ رات 3بجے آئے ہیں اور چند ایک رات سے ہی کوپن کے انتظار میں ہیں۔ میں فی الوقت آدھار میں ترمیم کے لئے آیاہوں، صرف ایک طرف انتظام ہونے سے مسئلہ پیدا ہورہاہے، مقامی رکن اسمبلی اس طرف توجہ دیں۔ تعلقہ انتظامیہ اس سلسلے میں مناسب قدم اٹھانےکی مانگ کی۔