بھٹکل 24 اکتوبر(ایس او نیوز) بھٹکل کے مرڈیشور پولس تھانہ حدود کے ہیراڈی میں چوری کی ایک بڑی واردات پیش آئی ہے جس میں چوروں نے قریب 17 تولہ سونا سمیت 35 ہزار روپیہ نقد لے کر فرار ہوگئے ہیں۔ چوری کی واردات سنیچر شام کو سامنے آئی ہے۔
پولس ذرائع سے ملی اطلاع کے مطابق گجانند نائک اور یمونا نائک نامی جوڑا ہوناور میں اپنے رشتہ داروں کے ہاں گئے تھے سنیچر شام کو واپس آئے تو گھر کا نقشہ بدل چکا تھا۔ گھر پر کوئی نہ رہنے کا فائدہ اُٹھاکر چوروں نے گھر کے دروازے کا تالہ توڑ کر اندر داخل ہوئے اور گھر پر موجود 173 گرام سونا اور نقد رقم 35 ہزار روپیہ لے کر فرار ہوگئے۔
چوری کی اطلاع ملتے ہی بھٹکل سرکل پولس انسپکٹر دیواکر سمیت مرڈیشور مضافاتی پولس تھانہ کے پی ایس آئی رویندرا بِرادر اور دیگر اہلکار جائے وقوع پر پہنچے اور جائزہ لیا، بعد میں دیر رات کو ہی کاروار سے ڈاگ اسکواڈ سمیت فنگر پرنٹس کے ماہرین کو بلوا کر جانچ کی کاروائی شروع کی گئی۔
مرڈیشور پولس تھانہ میں معاملہ درج کیا گیا ہے اور کرائم پی ایس آئی رویندرا کی قیادت میں جانچ جاری ہے۔