بھٹکل:25؍جنوری (ایس او نیوز) دی نیو انگلش پی یوکالج ، بلاک ایجوکیشن آفس اور بلاک ریسورس سنٹر کے اشتراک سے نیو انگلش پی یوکالج میں ایس ایس ایل سی طلبا وطالبات کے لئے ’داری دیوگے ‘عنوان پر امتحانی رہنمائی اور علمی مہارت پروگرام کا بلاک ریسورس سنٹر کی آفیسر یلما نے افتتاح کیا۔

بھٹکل ایجوکیشن سوسائٹی کے صدر ڈاکٹر سریش نایک نے پروگرام کی صدارت کی۔ ٹرسٹی مینجر راجیش نایک  نے اپنے خیالات کااظہارکیا۔ مرڈیشور آر این ایس اسپتال کے سائیکالوجسٹ ڈاکٹر دیپکا کلکور نے ’’امتحان سزا نہیں مزا ‘‘ کے عنوان پر ایس ایس ایل سی طلبا کو امتحانی خوف اور بخار سے چھٹکارا پانے میں  رہنمائی کی۔ کاروار کے شری مورتی سر نے ’امتحان میں زیادہ نمبرات کے لئے صرف نالج کافی نہیں بلکہ ٹکنک بھی ضروری ‘ کے عنوان پر  اپنا لکچر دیا۔ پرنسپال وریندر شانبھاگ نے ایس ایس ایل سی کے بعد کیا، موضوع  پر بات کی۔

ڈائس پروگرام کے بعد طلبا کے لئے منعقدہ کوئز مقابلے میں ودیا بھارتی ہائی اسکول نے اول مقام حاصل کیا، درگاپرمیشوری ہائی اسکول الویکوڑی دوم اور شرالی سینٹ تھامس ہائی اسکول کے طلبا نے سوم انعام حاصل کیا۔ انعامی تقریب میں ایجوکیشن کالج کے پرنسپال ڈاکٹر نرسمہا مورتی اوربیلکے سرکاری ہائی اسکول کی صدر مدرسہ ڈاکٹر سویتا نایک شریک تھے۔ تعلقہ بھر سے 200سے زائد طلبا و طالبات پروگرام میں شریک ہوئے۔