بھٹکل،25؍اکتوبر (ایس او نیوز) بھٹکل ٹورسٹ ٹیکسی مالکان اور ڈرائیوروں کی یونین  کے اراکین نے آج اتوار کو شیرور ٹول گیٹ پہنچ کر  ٹول گیٹ کے بعض اسٹاف پر الزام لگایا کہ وہ ڈرائیوروں کے ساتھ  بد تمیزی اور غنڈوں کی طرح برتاو کرتے ہیں۔ڈرائیوروں کے وفد کی قیادت کرتے ہوئے یونین کے نائب صدر فیصل پیرزادے نے  ٹول گیٹ کے پروجکٹ مینجربھوسلے کو بتایا  کہ شیرور ٹول گیٹ پر ان کےسا تھ جو ناانصافی ہورہی ہے اس کا ازالہ کیا جائے۔

فیصل نے کہا کہ بھٹکل کی سرحد سے شیرور ٹول گیٹ صرف ایک کلو میٹر کی دوری پر واقع ہے۔اور یہاں سے گزرنے والی ٹیکسیوں کو ٹول فیس  میں رعایت دیتے ہوئے صرف40  روپے ادا کرنے کی بات ٹھیکیدارکمپنی کے افسران اور ٹیکسی یونین  لیڈران کےدرمیان بات چیت میں طے ہوئی  تھی۔ مگر اب ٹول گیٹ پر خدمات انجام دینے والے اسٹاف اس شرط کی خلاف ورزی کررہا ہے اور کیش ٹریک پر ٹول اداکرنے کی صورت میں   40 کے بجائے 75روپے وصو ل کیے جارہے ہیں۔  اس کے علاوہ ٹول ناکہ کا عملہ ٹیکسی ڈرائیوروں کے ساتھ بدتمیزی اور غنڈوں کی طرح برتاؤ  پر اتر آتا ہے۔

انہوں نے مطالبہ کیا  کہ طے شدہ طریقے پر مقامی ٹیکسیوں کی رعایت بحال کرنے اور 40روپے ہی وصول کرنے کی ہدایت عملے کو دی جائے۔ ساتھ ہی کیش ٹریک اور فاسٹیاگ ٹریک کی نشاندہی کرنے والے بورڈ ٹول گیٹ سے کم از کم 500میٹر کی دوری پر نصب کیے جائیں  تاکہ ٹول کاونٹر پر پہنچ  کر پھنس جانے اور گاڑی واپس باہر نہ لے پانے کی صور ت حال سے ڈرائیور بچ سکیں۔انہوں نے کہا کہ  یونین کی طرف سے پیش کردہ شکایات دور نہیں کی گئیں تو پھر قانون کا راستہ اپنایا جائے گا۔اور اگر ڈرائیوروں کی طرف سے ٹول گیٹ عملے کوکوئی شکایت پیداہوتی ہے تو اس کو یونین  صدرکے علم میں لائیں، مگر ڈرائیوروں کے ساتھ غنڈہ گردی  اور بدتمیزی کے ساتھ ہرگز پیش نہ آئیں۔ انہوں نے کہا کہ اگر ٹیکسی ڈرائیوروں کی طرف سے کوئی شکایت موصول ہوگی تو ہم خود اُن کے خلاف کاروائی کریں گے۔انہوں نے کہا کہ آپ لوگ اگر ہمارے ساتھ عزت سے پیش آئیں گے تو ڈرائیورحضرات بھی آپ  لوگوں کے ساتھ عزت سے پیش آئیں گے۔

اس موقع پر یونین کی طرف سے پروجکٹ مینجر کو میمورنڈم بھی پیش کیا گیا جس میں  تمام شکایات درج  کی گئی ہیں اور اُن شکایتوں کو دور کرنے کی درخواست کی گئی ہے۔

یونین کے وفد سے گفتگو کرتے ہوئے پروجکٹ مینجر بھوسلے  نے بتایا کہ وہ  ابھی شیرور ٹول گیٹ  آکر صرف چار دن ہوئے ہیں۔ اس بناء پر انہیں اس بات کی جانکاری نہیں ہے کہ پہلے کیا بات چیت ہوئی تھی، انہوں نے اس تعلق سے غور کرنے کی یقین دھانی کرائی ساتھ ساتھ اس بات کا  یقین دلایا کہ وہ یہاں کے عملہ سے بدتمیزی کے ساتھ پیش آنے پر باز پرس کریں گے اور  اس تعلق سے  ضروری ہدایات دیں گے انہوں نے تیقن دیا کہ  آئندہ  ٹول گیٹ کے عملہ کی جانب سے ڈرائیوروں کو کسی بھی طرح کی شکایت کا موقع آنے نہیں دیں گے۔

یونین کے وفد میں فیصل سمیت  خلیل، فیاض، فیروز، الیاس ، مہیش، روی، رمیش اور رگھو سمیت کافی ڈرائیورس موجود تھے۔