نئے ڈپٹی کمشنر کی بھٹکل آمد پر تنظیم وفدنے کیا استقبال، اہم مسائل کی طرف دلائی توجہ
بھٹکل 20 فروری (ایس او نیوز) اُترکنڑا کے نئے ڈپٹی کمشنر کے طور پرکاروار میں حال ہی میں چارج لینے والے ملئے مہیلن کی بھٹکل آمد پر قومی سماجی ادارہ مجلس اصلاح و تنظیم نے پرتپاک استقبال کیا اور تنطیم کا مختصر تعارف پیش کرتے ہوئے تنظیم کی جانب سے کی جانے والی سرگرمیوں کی مختصراً جانکاری دی۔ اس موقع پر بھٹکل کے اہم مسائل کی طرف بھی موصوف کی توجہ دلائی گئی اور سابق ڈپٹی کمشنر اور دیگر وزراء کو دئے گئے میمورنڈم کی نقول بھی موصوف کو پیش کرتے ہوئے مسائل کو حل کرنے کی درخواست کی۔
تنظیم کی طرف سے سابق نائب صدر عنایت اللہ شاہ بندری نے پھول کی مالا پیش کرتے ہوئے تنظیم کا تعارف پیش کیا تو وفد میں شامل اشفاق کے ایم نے بھٹکل کے اہم مسائل بالخصوص نوائط کالونی اور دیگرعلاقوں کا نقشہ نہ ہونے سمیت دیگر مسائل کی طرف موصوف کی توجہ مبذول کراتے ہوئے جملہ آٹھ میمورنڈم کی نقول پیش کیں۔ محی الدین رکن الدین نے رابطہ سوسائٹی کا تعارف پیش کرتے ہوئے بھٹکلی این آر آئیز کو پیش ہونے والی دشواریوں کو پیش کرتے ہوئے حل کی طرف توجہ دلائی۔ تنظیم سکریٹری مالیات صدیق ڈی ایف، خازن احید محتشم، بھٹکل مسلم یوتھ فیڈریشن کے صدر عزیز الرحمن رکن الدین ندوی، بھٹکل میونسپل اسٹینڈنگ کمیٹی چیرمین فیاض مُلّا اور ڈاٹا ارشاد بھی موجود تھے۔ بھٹکل سرکل پولس انسپکٹر دیواکر، پی ایس آئی بھرت، پی ایس آئی کوڈگنٹی و دیگر افسران بھی اس موقع پر موجود تھے۔
