بھٹکل 29/اگست (ایس او نیوز)بھٹکل تعلقہ پنچایت کے صدر ایشور نائک نے الزام لگایا ہے کہ تعلقہ میں کووڈ کی روک تھام کے نام پر سرکاری افسران سیاسی کھیل کھیلنے میں مصروف ہیں۔

 خیال رہے کہ ایشور نائک اس وقت خود کی کووڈرپورٹ پوزیٹیو نکلنے کے بعد بھٹکل تعلقہ اسپتال میں زیرعلاج ہیں۔انہوں نے اخباری نمائندوں سے گفتگو کرتے ہوئے کہاکہ:”مجھے کورونا مرض لاحق ہونے کی تصدیق سے آٹھ دس دن پہلے سے ہی میں اپنے گھر پر موجود نہیں تھا۔گزشتہ چارپانچ دن سے میں بھٹکل کے سرکاری اسپتال میں زیر علاج ہوں۔اس دوران سرکاری افسران نے مجھ سے میرے ابتدائی رابطے میں آنے والوں کے تعلق سے کوئی پوچھ تاچھ نہیں کی تھی۔لیکن ریوینیو ڈپارٹمنٹ اور گرام پنچایت کے افسران میرے گھر، میرے پڑوس کے گھر اور کاجو کی فیکٹری میں جاکر تصویریں اتاری ہیں۔ ان کی اس حرکت سے میرے گھر والے خوف زدہ ہوگئے ہیں۔ فیکٹری کے ملازمین کام پر نہیں آر ہے ہیں۔“

 ایشور نائک نے افسران پر دوہرا معیار اپنانے اور سیاسی کھیل کھیلنے کا الزام لگاتے ہوئے کہا کہ ”ابھی چند ہی دن پہلے بھٹکل رکن اسمبلی سنیل نائک کی جانچ پوزیٹیو نکلی تھی اور ابھی بھی وہ منی پال کے اسپتال میں زیر علاج ہیں۔ لیکن ان کے ابتدائی رابطے میں آنے والوں کی تفصیل معلوم کرنے کی کوشش کسی بھی سرکاری افسر نے نہیں کی۔ چونکہ میں اپوزیشن پارٹی کا رکن ہوں اسی وجہ سے افسران میرے ساتھ ایسا رویہ اپنا رہے ہیں۔“ انہوں نے سوال کیا کہ اگرایک عوامی منتخب نمائندے کے ساتھ ایسا کیا جارہا ہے تو پھر عام لوگوں کے ساتھ کیا کچھ نہیں ہوتا ہوگا۔