بھٹکل:10/اگست (ایس اؤنیوز)زمین جائیداد اور شادی وغیرہ کی رجسٹریشن ، پارٹنر شپ ڈیڈ، ٹرسٹ رجسٹریشن وغیرہ کےلئے مہیا کی گئی بھٹکل سب رجسٹرارآفیس میں پچھلے ایک ہفتہ سے انٹرنیٹ اور نیٹ ورک کا مسئلہ پیدا ہونے سے کام کاج پوری طرح بند ہے۔ عوام کا الزام ہے کہ  اعلیٰ افسران مسئلہ کا مستقل حل تلاش کرنےکی طرف کوئی خاطرخواہ توجہ نہیں دے رہے ہیں ۔

اپنی روزمرہ کارروائی کے لئے دفتر کا چکر کاٹنے والے عوام نے الزام لگایا ہے کہ رجسٹریشن دفترکے سامنے جلی حرفوں میں نوٹس بورڈ چسپاں کرکے افسران خامو ش ہوگئے ہیں مسئلہ کے حل کی طرف کوئی توجہ نہیں دے رہے ہیں۔40-30کلومیٹر دوری طئے کرکے زمین ، جائیداد، شادی وغیرہ کی رجسٹریشن کے لئے دفترپہنچنے والے دیہی عوام چکر کاٹ کاٹ کر واپس جانے پر مجبور ہیں، دفتر میں یہی جواب ملتا ہے کہ نٹ ورک پرابلم ہے، دو روز بعد شائد ٹھیک ہوجائے، عوام  آج ہوگا اور کل ہوگا کے انتظارمیں  افسران کے متعلق برہمی کا اظہار کررہے ہیں۔

مسئلے کو لےکر جب ساحل آن لائن نے بھٹکل سب رجسٹریشن دفتر پہنچ کر  آفیسر راجیشوری ہیگڈے سے بات کی تو انہوں نے بتایاکہ پچھلے ایک ہفتہ سے دفترمیں انٹر نیٹ کا مسئلہ درپیش ہے، سرور کام نہیں کررہاہے، اسی لئے دفتر میں کسی کام کو انجام دینا ممکن نہیں ہوپارہاہے، انہوں نے آگے بتایا کہ  ہم اپنی جگہ پر خاموش نہیں بیٹھے ہیں بلکہ اس تعلق سے اعلیٰ افسران کو شکایت ارسال کرچکے ہیں۔ہم اپنی طرف سے اتنا ہی کرسکتے ہیں کہ اپنے اعلیٰ حکام کو خبر کریں کہ جلدی سے نٹ ورکنگ کا مسئلہ دور کرے، میں نے تحریری طور پر بھی کاروار رجسٹرار دفتر میں مسئلہ کے تعلق سے خبر کی ہے ساتھ ساتھ تعلقہ کے آفسران کو بھی کام کاج ٹھپ پڑنے کے تعلق سے جانکاری دی ہے۔ ساحل آن لائن نمائندہ جب سب رجسٹرار دفتر پہنچا تو آفس میں صرف  سناٹا چھایا ہوا تھا،  کرسیاں خالی پڑی تھیں اور پورے دفتر میں خاموشی چھائی ہوئی تھی۔

اس تعلق سے ساحل آن لائن سے فون پر گفتگو کرتے ہوئے کاروار رجسٹرار آفسر محمد علی نے بتایا کہ بھٹکل میں سرور اور نٹ ورک خراب ہونے کی اطلاع موصول ہوئی ہے، اور ہم نے بنگلور  کیس ون نٹ ورک سے رابطہ کرتے ہوئے اس کی فوری درستگی کی درخواست کی ہے، اب دیکھنا باقی ہے کہ وہ لوگ کب اس خرابی کو درست کرتے ہیں۔ ساحل آن لائن نے سب رجسٹرار آفس میں کام رُکنے کی اطلاع بھٹکل اسسٹنٹ کمشنر مسٹر منجوناتھ کو بھی دی ہے اور انہوں نے بھی یقین دلایا ہے کہ وہ اس  طرف فوری توجہ دیں گے اور کام کو دوبارہ جلد سے جلد شروع کرنے کے لئے ہر ممکن کوشش کریں گے۔

 خیال رہے کہ گذشتہ سال بھی ایسا ہی مسئلہ ہونے سے قریب ایک ماہ تک دفتر میں کام کاج بند پڑ گیا تھا، بعد میں  رکن اسمبلی منکال وئیدیا کی مداخلت اور بروقت مسئلہ کو حل کرنےکی وجہ سے دفترمیں کام دوبارہ بحال ہوگیا تھا۔