بھٹکل:15؍دسمبر(ایس اؤ نیوز) تربیت ایجوکیشن سوسائٹی اور رائچور کی اے جے اکیڈمی کے اشتراک سے نیو شمس اسکول میں منعقدہ بھٹکل انٹر اسکول سائنس فئیر کا بھٹکل کے اسسٹنٹ کمشنر ساجد ملا نے ربن کاٹ کا افتتاح کیا۔

افتتاح کے بعد خطاب کرتے ہوئے اے سی ساجد ملانے کہاکہ سائنس انسان کو غوروفکر کرنا سکھاتا ہے، سائنٹفک سوچ ترقی کرتی ہے تو سچ اور جھوٹ کا شعور پیدا ہوتاہے،انہوں نے طلبا سے اپیل کی کہ وہ اپنے تعلیمی دور کے  مختلف مرحلو ں میں سائنس کے مضامین کا شعور حاصل کرتےہوئے آگے بڑھیں۔

اے جے اکیڈمی کے ڈائرکٹر محمد عبداللہ جاوید نے سائنس فئیر کے متعلق اظہار خیال کرتے ہوئے  سائنسی نمائش اور سائنس فئیر میں فرق نمایاں کرتےہوئے کہاکہ عالمی سطح پر سائنس نمائش کی کوئی اہمیت نہیں ہے ، اگر ہم پرائمری کی سطح پر ہی بچو ں میں سائنس فئیر کے ذریعے تحقیقی صلاحیتوں کو پروان چڑھائیں تو بین الاقوامی سطح پر ان کی اہمیت واضح ہوگی۔ بھٹکل سائنس فئیر کے کو آرڈنیٹر محمد رضا مانوی نے افتتاحی کلمات پیش کرتے ہوئے سبھی کا استقبال کیا۔ استانی وینا نے نظامت کے فرائض انجام دئیے اور آخر میں شکریہ کلمات پیش کئے۔

سائنس فئیر میں تعلقہ کے 11اسکولوں سے 40سے زائد پراجکٹس اور 150طلبا اور اساتذہ نے شرکت کی۔ ادارے کے صدر محمد اسماعیل محتشم ، نائب صدر نذیر احمد قاضی ، جنرل سکریٹری مولانا ضیاء الرحمن رکن الدین ندوی ، انتظامیہ ممبر مولانا ایس ایم سید زبیر ڈائس پر موجود تھے۔