بھٹکل میں تنظیم کے زیرا ہتمام ملک میں جاری ماب لنچنگ کی مذمت میں 5جولائی کو ہوگا زبردست احتجاجی مظاہرہ ؛ عوام سے شرکت کی درخواست
بھٹکل:3؍جولائی (ایس اؤ نیوز) ملک بھر میں اقلیتوں اور مظلوم طبقات کو نشانہ بنا نے کی سخت مذمت کرتے ہوئے اور ایک کے بعد ایک مسلم نوجوانوں کے بے دردی سے قتل کرنے پر سخت ناراضگی کا اظہار کرتے ہوئے بھٹکل کے سیاسی ، سماجی و فلاحی ادارے مجلس اصلاح وتنظیم کے زیر اہتمام 5جولائی بروز جمعہ بعد نماز عصر ایک احتجاجی ریلی اور زبردست احتجاجی جلسہ کا اہتمام کیا گیا ہے۔
تنظیم کی طرف سے پریس ریلیز جاری کرتے ہوئے تنظیم کے جنرل سکریٹری مولوی عبدالرقیب ایم جے ندوی نے بتایا کہ احتجاجی ریلی عید گاہ سے پونے پانچ بجے نکلے گی اور شمس الدین سرکل سے ہوتے ہوئے پبلک چبوترے پر پہنچ کر احتجاجی جلسہ میں تبدیل ہوجائے گی۔ جہاں ملک میں امن وامان کی بگڑتی صورتحال اور درپیش خطرات کے تعلق سے اظہار خیال کیا جائے گا۔
انہوں نے بتایا کہ یہ مذمتی اجلاس اور احتجاجی مظاہرہ کسی فرقے یا قوم کے خلاف نہیں ہے بلکہ مظلوموں کی حمایت اور ظالموں کی مخالفت کرنا مقصد ہے۔ کیونکہ ملک میں قانون کی بالادستی ختم کرنے اور شرپسندوں کے ذریعے قانون اپنے ہاتھ میں لینے کی وجہ سے باشندگان ملک کے اندر خوف و دہشت کا ماحول پیدا ہوگیا ہے۔ لاقانونیت جیسے اس ماحول میں اقلیتیں اپنے آپ کو بالکل غیر محفوظ محسوس کررہی ہیں، اس سلسلے میں مرکزی حکومت کو چاہئے کہ امن وامان اور دستور کی بالادستی کوقائم رکھنے کے سلسلےمیں اقدامات کرتےہوئے قانون بنائے۔ مختلف بہانوں کے ذریعے ہورہے جان لیوا حملوں کا سلسلہ روکاجائے، مجرموں کو قرار واقعی سزا دی جائے۔ انہوں نے بتایا کہ ان مطالبات کے ساتھ بھٹکل اسسٹنٹ کمشنر کی معرفت ضلع کے ڈپٹی کمشنر کو میمورنڈم پیش کیا جائے گا۔
تنطیم کی طرف سے بھٹکل و اطراف کے عوام سے درخواست کی گئی ہے کہ وہ بلا تفریق مذہب و ملت، انسانیت اور امن و امان کی بقا کے لئے ہونے والے اس مظاہرے میں کثیر تعداد میں میں شریک ہوں۔ بھٹکل کے مقامی تاجروں سے بھی گذارش کی گئی ہے کہ وہ جمعہ کی دوپہر سے جلسے کے اختتام تک اپنی دکانیں بند رکھتےہوئے اس احتجاجی مظاہرے میں شرکت کریں اور احتجاج کو کامیاب بنائیں۔