بھٹکل میں مجلس اصلاح وتنظیم کی جانب سے پلوامہ دہشت گردانہ حملہ کی کڑی مذمت: تحصیلدار کی معرفت وزیراعظم کو میمورنڈم ؛کڑی کارروائی کا مطالبہ
بھٹکل:16؍فروری (ایس او نیوز)کشمیر کے پلوامہ میں دہشت گردانہ حملے کی کڑی مذمت کرتے ہوئے مجلس اصلاح وتنظیم بھٹکل نے تحصیلدار کی معرفت وزیر اعظم نریندر مودی کے نام میمورنڈم پیش کیاجس میں دہشت گردی کا کرار ا جواب دینے کا مطالبہ کیا گیا ہے۔
میمورنڈم میں کہاگیا ہےکہ 14فروری کو کشمیر کے پلوامہ میں انسانیت سوز حملے میں ہمارے40سے زائد دلیر و بہادر فوجیوں نے اپنی جان ملک کے لئے قربان کی ہے۔ اس موقع پر ہم ہندوستانی حکومت کے شانہ بہ شانہ کھڑے ہوکر اس کے کرارے جواب کی مانگ کرتے ہیں۔
وزیراعظم سے مانگ کی گئی ہے کہ ملک کی سرحدوں کی حفاظت کے لئے تعینات ہمارے فوجیوں کی سکیورٹی کے لئے مناسب ضروری اقدامات اٹھائے جائیں۔ ہمیں دہشت گردی کا متحدانہ مقابلہ کرتے ہوئے ملکی سلامتی میں کسی طرح کی کوئی چھوٹ یا رعایت نہیں کرنا چاہئے۔ دہشت گردانہ حملے میں جو کوئی ملوث ہے اس کو کیفر کردار تک پہنچانا چاہئے۔ ہمارا مطالبہ ہے کہ اسپانسرڈ دہشت گردی اور دہشت گرد گروپس کے فوری خاتمہ کو یقینی بنائیں۔ قریب کے برسوں میں مختلف دہشت گردانہ حملوں میں ہمارے پیارا ملٹری فورسس کے قریب 350جوان اپنی جانیں قربان کرچکے ہیں۔ اس سلسلے میں حکومت ہند ٹھوس بنیادی اقدامات کرتے ہوئے سکیورٹی فورس کی حفاظت کریں تاکہ مستقبل میں پھر اس طرح کا واقعہ پیش نہ آسکے۔
مجلس اصلاح وتنظیم حملے کی کڑی مذمت کرتے ہوئے پسماندگان اور خاندان والوں کے ساتھ ہمدردی ، گہرے رنج و غم کا اظہار کرتی ہے۔ تنظیم نے اس کو قومی سانحہ قرار دیتے ہوئے پیغام دیا کہ ہم سب متحد اور ایک ہیں۔ تنظیم نے واضح کیا کہ دہشت گردی کے خاتمہ کے لئے مجلس اصلاح و تنظیم ہمیشہ ملک کے ساتھ کھڑی ہے۔
تحصیلدار دفتر میں جمع سینکڑوں افراد سے خطاب کرتے ہوئے تنظیم کےنائب صدر عنایت اللہ شاہ بندری نے کہا کہ ہم ملک کے اتحاد و سالمیت کے لئے اپنی جان قربان کرنے کے لئے تیار ہیں۔ سنئیر صحافی ڈاکٹر محمد حنیف شباب ؔ نے بھی کہا کہ ملک کی حفاظت کے لئے مسلمان ہمیشہ اپنی جانوں کی قربانی دینے کے لئے تیار ہیں، انہوں نے اس موقع پر دیش دروہیوں کو کرارا جواب دینےکی بھی با ت کہی۔ صحافی محمد رضامانوی نے کہاکہ جمعہ کی نمازوں میں کئی مساجد میں شہید فوجیوں کے لئے دعائیں کی گئی ہیں ، انہوں نے متاثرہ خاندانوں کے ساتھ گہرے غم کا اظہارکرتےہوئے کہاکہ ہم سب ان خاندانوں کے ساتھ ہیں۔
مجلس اصلاح وتنظیم کے جنرل سکریٹری محی الطاف کھروری نے تحصیلدار وی این باڈکر کو میمورنڈم سونپا ۔ اس موقع پر تنظیم کے سکریٹری مولانا سید یاسر ندوی،ہاشم برنی ،صدیق ڈی ایف، مولانا عزیز الرحمن رکن الدین ندوی،وکیل عمران لنکا، فیڈریشن کے صدر امتیاز ادیاور،بلدیہ صدر محمد صادق مٹا، جالی پنچایت صدر آدم پنمبور، انجمن کے سکریٹری محسن شاہ بندری سمیت کئی لوگ موجود تھے۔