بھٹکل میں بچہ چوری کے شبہ میں ایک نوجوان پر حملہ؛ پتھر سے سر پھوڑا گیا؛ ملزم گرفتار
بھٹکل:06؍اکتوبر(ایس اؤ نیوز)اتوار کی شام جالی سمندر ساحل پر تفریح کے لئے جانے کے دوران ایک نوجوان پر بچہ چوری کاالزام لگاتے ہوئے اس شخص نے پیچھا کرتےہوئے پتھر سے حملہ کردیا جس کی وجہ سے اُس کے سر پر شدید چوٹ لگی ہے۔
حملہ کا شکار ہوکر زخمی ہونے والے نوجوان کی شناخت اترپردیش سے تعلق رکھنے والے محمد ریاض (30) کی حیثیت سے کی گئی ہے۔ محمد ریاض کے متعلق بتایا گیا ہے کہ وہ پچھلے دو مہینوں سے اپنے تین چاردوستوں کے ساتھ پلاسٹر آف پیاریس(پی اوپی ) کی مزدوری کرتے ہوئے بھٹکل میں رہائش پذیرہیں۔
بتایا گیا ہے کہ محمد ریاض اتوار کی شام کو جالی سمندر ساحل پر تفریح کے لئے جارہاتھا تو اسی دوران شری ناتھ انپا نائک (30) نامی اُسی علاقہ کے ایک شخص نے بات کرنے کی کوشش کی، مگر جب ریاض جواب دئیے بغیر آگے چلا گیا تو شری ناتھ نے اس کا پیچھا کیا اور جیسے ہی ریاض سمندر کے کنارے بیٹھ کر نظارہ کرنے لگا تو ریاض کے سر پرپتھر دے مارا، جس کے نتیجے میں ریاض شدید زخمی ہو گیا۔
ریاض کو بعد میں بھٹکل سرکاری اسپتال میں علاج کے لئے لایا گیا۔ بتایا گیا ہے کہ ملزم شری ناتھ شراب کے نشےمیں دھت تھا۔ پولس نے ملزم کو اپنی تحویل میں لے لیا ہے اور بھٹکل شہری پولس تھانہ میں کیس درج کرلیا گیاہے۔ ایس آئی ہنومنت کوڈگونٹی کی نگرانی میں جانچ جاری ہے۔
شبہات اور زور زبردستی : حملہ کا شکار نوجوان ریاض کا تعلق اترپردیش ہے۔ کہا جارہاہے کہ مقامی طورپر شناسائی نہ ہونے اور بال لمبے چھوڑنےکی وجہ سے ملزم نے اس پر شک کیا۔ لوگوں کا کہنا ہے کہ موبائیل میں وائرل ہونے والے بچہ اغواکاری کے مسیجس اور وڈیوکلپس ایسے واقعات کو اشتعال دلاتے ہیں۔ البتہ یہ بھی کہا جارہا ہے کہ شراب کے نشے میں دھت ہونے کی وجہ سے شری ناتھ نے اس طرح کا حملہ کیا ہے۔
ایسے میں ملزم شری ناتھ کی حمایت میں بھی کچھ لوگ پولس تھانہ پہنچ کرمحمد ریاض کے خلاف بھی شکایت درج کرنے کی کوشش کی کہ وہ واقعی بچہ چوری کرنے والا بھی ہوسکتا ہے۔ دوسری طرف سر کو شدید چوٹ لگنے کے بعد اُس کی حمایت میں بھی کچھ لوگ آگئے اور پولس سے مطالبہ کیا کہ وہ حملہ آور کے خلاف معاملہ درج کرے، جس کے بعد حملہ کرنے کے الزام میں شری ناتھ کے خلاف معاملہ درج کیا گیا۔
