بھٹکل:6؍مارچ (ایس اؤ نیوز) بھٹکل ہوناور تعلقہ جات کے جن اوشدھی(سرکاری میڈیکل شاپ) کے مالکان محاذ کے اشتراک سے تیسرے سال کا یوم ِ جن اوشدھی پروگرام بھٹکل منی ودھان سودھا میں منعقد ہوا ۔
پروگرام کی صدارت کرتے ہوئے بھٹکل اسسٹنٹ کمشنر ساجد ملا نے کہاکہ 2008سے ملک بھر میں جن اوشدھی کا چلن ہے۔ لیکن کوئی اس کی طرف زیادہ توجہ نہیں دےرہاہے حالانکہ چند برسوں سے ان دوائیوں کے تعلق سے کافی تشہیر ہونےکی وجہ سے ہر تعلقہ کے عوام کو یہاں سے سستی دوائیاں مل رہی ہیں۔ ساجد مُلا نے کہا کہ جن اوشدھی کے متعلق عوام کو اپنا نظریہ بدلنے کی ضرورت ہے۔
پروگرام کا افتتاح کرنے کے بعد خطاب کرتےہوئے بھٹکل تعلقہ میڈیکل آفیسر ڈاکٹر سویتا کامت نےکہاکہ جن اوشدھی میں ملنے والی دوائیوں کےمعیار میں کوئی کمی نہیں ہے۔ گزشتہ دو برسوں سے سرکاری اسپتال کے آئی سی یو میں داخل مریضوں کو بھی جن اوشدھی کی دوائیاں دی جارہی ہیں، جس کا بہتر نتیجہ دیکھا گیا ہے۔ جن اوشدھی میں دوائیاں بہت ہی کم قیمت پر ملتی ہیں تو عوام کو چاہئے کہ وہ اس سے استفادہ کریں۔ سچن ہیگڈے نے جن اوشدھی کی دوائیوں کےمتعلق اپنا مقالہ پیش کیا۔
موہن دیواڑیگا وینکٹاپور نے استقبال کیا۔استاد نارائن نائک نے نظامت کے فرائض انجام دیتےہوئےآخر میں شکریہ کلمات پیش کئے ۔ اس موقع پر محمد حنیف شیخ ، اسکند جی نائک، جگدیش وغیرہ موجود تھے۔