بھٹکل :یکم جنوری  (ایس اؤ نیوز ) شہر کے سرکاری اسپتال کےقریب واقع پوسٹ میٹرک مائنارٹی بوائز ہاسٹل میں گھس کر طلبا پر حملہ کرنے اور توڑپھوڑ کئے جانےکا واقعہ اتوار کی رات 11بجے پیش آیا ہے۔

واقعہ کو لےکر ہاسٹل کےنگراں کار ناگیندر ایس نے بھٹکل شہری پولس تھانے میں شکایت درج کی ہے جس میں تین مبینہ حملہ اوروں کی شناخت بھٹکل ہورلی سال کے مکین راگھویندر عرف بابوراما نائک ، تلگوڈ کےنندن جین اور مزید ایک (جس کانام درج نہیں کیاگیا ہے)کی حیثیت سے کی گئی ہے۔ شکایت میں کہاگیا ہےکہ مندرجہ بالا تینوں ملزم 31ڈسمبر2023بروزاتوار کی رات 11بجے ڈنڈوں اور ، کرکٹ بیٹ وغیرہ کے ساتھ ہاسٹل  میں گھس کر طلبا سے مارپیٹ کرتےہوئے انہیں زخمی کیاہے۔ اس کے علاوہ ہاسٹل کے کمروں کےدروازوں اور پلاسٹک کرسیوں وغیرہ کو بھی نقصان پہنچایا ہے۔ اسی دوران ہاسٹل میں مقیم طالب علم نوید منصور خان پر ملزموں نے ڈنڈوں وغیرہ سے حملہ کرتےہوئے اسے شدید زخمی کیاہے اور اسے ڈرایا اوردھمکایا بھی ہے۔ پولس نے کیس درج کرلیا ہے اور پی ایس آئی شیوانند ناودگی جانچ کررہےہیں۔