بھٹکل:16/ جنوری (ایس اؤنیوز) بھٹکل سرکاری اسپتال میں 9 ڈاکٹرس خدمات پر مامور ہونے کے باوجود پیر کے دن کوئی بھی ڈاکٹر حاضر نہ  ہونے کی میڈیا میں رپورٹ  شائع ہونے کے بعد ضلعی میڈیکل آفیسر ڈاکٹر اشوک کمار کاروار سے بھٹکل  پہنچے اور تعلقہ اسپتال  کا معائنہ کیا اور اسپتال کی بد نظمی پر  تعلقہ میڈیکل آفیسر ڈاکٹر منجوناتھ شٹی کو آڑے ہاتھوں لیا۔

ادھر چند سالوں سے تعلقہ اسپتال بد نظمی کا شکار ہونے کی شکایتیں موصول ہورہی تھیں۔ پیر کو اسپتال میں مریضوں کی علاج  کے لئے کوئی ڈاکٹر حاضر نہ ہونے سے مریض مشکلات سے دوچار ہوگئے تھے۔ اسی معاملے کا جائزہ لینے کے لئے ضلعی میڈیکل افسر بھٹکل پہنچے تو جئے کرناٹکا سنگھا کے عہدیداران اور دیگر لیڈران نے انہیں آڑے ہاتھوں لیا۔ انہوں نے بتایا کہ اسپتال کی دگرگوں حالت کے تعلق سے اُنہیں  کئی بار شکایتیں دی گئی تھی اور  حالات کو سدھارنے پر زور دیا گیا تھا، مگر ہر بار آپ نے جھوٹا وعدہ کیا، جس کانتیجہ ہے کہ مسائل ختم ہونے کے بجائے  مزید  الجھ رہے ہیں جس سے غریب عوام متاثرہورہے ہیں۔ احتجاجیوں نے میڈیکل آفیسر پر راست الزام لگاتے ہوئے کہاکہ اسپتال کی بدنظمی کے لئے میڈیکل آفیسر ہی اصل ذمہ دار ہے ۔انہوں نے میڈیکل افسر سے سوال کیا کہ اسپتال کی نگو مگو ایمبولنس اور ایمرجنسی ایمبولنس مریضوں کو لے جا نے والی سرویس مفت ہے یا  عوام کو ڈیزل کی قیمت ادا کرنی ہے۔ انہوں نے کہا کہ ان ایمبولنس کو بلائے جانے پر ڈیزل کا خرچہ عوام سے لیا جاتاہے، لہٰذا اس سلسلے میں میڈیکل آفیسر کو ٹھیک سے جانکاری دیں۔سنگھا کی طرف سے اس بات کا بھی الزام عائد کیا گیا کہ تعلقہ میڈیکل آفیسر اپنے ذاتی کاموں کے لئے ایمبولنس کا استعمال کرتےہوئے 60ہزار روپیوں کا غلط استعمال کئے جانےکی اطلاعات ہیں، اس سلسلے میں مناسب جانچ کی جائے۔

عوام نے حاملہ خواتین کے لئے جاری کی گئی سرکاری نگو مگو  ایمبولنس کے  غیر ضروری استعمال پر بھی جانچ کئے جانے کا مطالبہ کیا۔ احتجاجیوں  کی طرف سے الزام لگایا گیا کہ اسپتال کے بلڈ ٹیسٹ  سینٹر کا خون خانگی طورپر فروخت کرنے کے لئے ایک نجی لیاب کے فرد کو نامزد کیا گیا ہے، اور اس بدعنوانی میں ایک ڈاکٹر اور بلڈ ٹیسٹ سینٹر کا ٹکنشن بھی شامل ہے۔ ضلع میڈیکل آفیسر نے وضاحت کرتے ہوئے کہاکہ اگر مناسب ثبوت فراہم کئے جائیں تو جانچ کی جائے گیا۔عوام  کی طرف سے اسپتال کی  بدنظمی کے لئے ذمہ دار ڈاکٹر منجوناتھ شٹی کو ہٹا کر اُن کی جگہ پر کسی اہل آفیسر کو تقرر کرنے کی مانگ کی گئی۔

ضلع میڈیکل آفیسر ڈاکٹر اشوک کمار نے بتایا کہ میڈیکل آفیسر اور دیگر ڈاکٹروں کے درمیان میل جول نہ ہونے سے بدنظمی ہوئی ہے۔ وہ معاملے کی پوری طرح تفتیش کریں گے اور موجودہ میڈیکل آفیسر کے بجائے اسپتال میں موجود9 ڈاکٹروں میں سے کسی ایک اہل ڈاکٹر کو نامز دکریں گے۔ اسپتال کے تعلق سے دیگر جو الزامات عائد کئے گئے ہیں انہوں نے وعدہ کیا کہ وہ  خود ان کی جانچ کرتے ہوئے کارروائی کریں گے۔ بھٹکل اسپتال معاملے کی اطلاع ریاستی وزیر صحت اور ضلع ڈپٹی کمشنر کو مل چکی ہے اس سلسلے میں ان سے گفتگوکرنے کے بعد آگے قدم اٹھانے کی با ت کہی۔