بھٹکل 9/مئی (ایس او نیوز)بھٹکل کی ایک خاتون کا   اپنی بچی کے علاج کے خاطر مینگلور کے فرسٹ نیورو سینٹر جانا اتنا زیادہ مہنگا ثابت ہوگا یہ کسی کے وہم و گمان بھی نہیں تھا، بھٹکل میں تمام گیارہ پوزیٹو مریض  صحتیاب  ہوکر بھٹکل پہنچنے کے بعد عوام راحت کی سانس لے ہی رہے تھے اور لاک ڈاون کے کھلنے کے منتظر تھے  مگر 5مئی کو ایک خاتون کی رپورٹ کورونا پوزیٹو آتے ہی  سلسلہ مزید دراز ہوتا ہوا نظر آرہا ہے۔

جمعہ کو ایک ساتھ 12 کورونا کیسس، پھر سنیچر صبح کو سات پوزیٹو کیسس آنے کے بعد تمام مریضوں کو کاروار اسپتال روانہ کرنے کی تیاری جاری  ہی تھی کہ سنیچر شام کو  خبر موصول ہوئی کہ بھٹکل کی ایک اور خاتون کی رپورٹ کورونا پوزیٹو آئی ہے۔ 

معلوم ہوا ہے کہ 32 سالہ خاتون اُن ہی افراد  کے رابطے میں تھی جہاں کے 20 لوگوں کی رپورٹ کورونا پوزیٹو آچکی ہے۔ خبر ملی ہے کہ یہ خاتون بھٹکل کے کوگتی نگر کی ہے۔ فی الحال اس خاتون کے تعلق سے مزید جانکاری ملنی باقی ہے۔

خیال رہے کہ تازہ معاملہ سامنے آنے کے بعدمینگلور کے فرسٹ نیورو سے بھٹکل منتقل ہونے والے کورونا  معاملات کی تعداد  بڑھ کر اب 21 ہوگئی ہے۔خیال رہے کہ اس سے قبل پہلے مرحلے میں گلف سے لوٹنے والوں میں کورونا کے اثرات پائے گئے تھے وہ تمام گیارہ مریض مکمل طور پر صحت یاب ہوچکے ہیں، ان سب کو ملائیں تو بھٹکل اور اُترکنڑا میں کورونا مریضوں کی تعداد بڑھ کر اب 32 ہوگئی ہے۔