بھٹکل ،27؍ جنوری (ایس او نیوز) بھٹکل تعلقہ اسٹیڈیم میں 73 ویں یوم جمہوریہ کے موقع پر پرچم کشائی کے بعد خطاب کرتے ہوئے اسسٹنٹ کمشنر ممتا دیوی نے کہا کہ ہمارے ملک کا آئین خود اپنی بڑی اہمیت رکھتا ہے ۔ اس دستور کے تحت آزادی، مساوات اور بھائی چارگی کا بول بالا ہے ۔ ہمارے ملک کی ایک شاندار تاریخ ہے ۔ اور ترقی کے میدان میں صف اول میں رہنے والا ملک ہے ۔ زندگی کے ہر شعبہ میں ہمارا ملک جو ترقی کر رہا ہے وہ ہم سب کے لئے باعث افتخار ہے ۔ خاص کرکے کووڈ کے دوران بھی جو کارکردگی ہوئی ہے وہ ایک سنگ میل کی حیثیت رکھتی ہے اور قابل ستائش کارنامہ ہے ۔

پروگرام کی صدارت کرتے ہوئے رکن اسمبلی سنیل نائک نے کہا کہ کووڈ کے دوران بھی جشن یوم جمہوریہ پوری شان کے ساتھ منایا جارہا ہے ۔ ملک کی آزادی کے لئے ایثار اور قربانی کرنے والوں کی ستائش کرنا ہم سب کا فرض ہے ۔ انہوں نے کہا کہ اگر حکومت کا کام خوش اسلوبی سے چلنا ہے تو پھر سرکاری دفاتر میں افسران کو بہترین کارکردگی دکھانی چاہیے ۔ اور عوامی مسائل کو بہتر انداز میں حل کرنا چاہیے ۔ 

اس موقع پر مختلف میدانوں میں عمدہ کارکردگی انجام دینے والوں کی تہنیت کی گئی ۔ ٹیچرس کی طرف سے کووڈ بیداری کے تعلق سے گیت پیش کیا گیا۔  تحصیلدار ایس روی چندرا نے استقبال کیا ۔ ٹیچر شریدھر شیٹھ نے نظامت کی ۔ بلاک ایجوکیشن آفیسر دیوی داس موگیر نے شکریہ ادا کیا ۔

پروگرام کے دوران اسٹیج پر ٹی ایم سی صدر پرویز قاسمجی ، ٹی ایم سی چیف آفیسر رادھیکا ایس این، جالی پٹن پنچایت چیف آفیسر رام چندرا ویرنیکر، سرکاری نوکرا سنگھا کے صدر موہن نائک وغیرہ موجود تھے ۔