بھٹکل 26/اکتوبر(ایس او نیوز) بھٹکل نیشنل ہائی وے پرواقع ایک ہوٹل میں ہوئے عفان جبالی نامی نوجوان کے قتل کے معاملے میں آج سنیچر کو پولس نے چوتھے ملزم کو گرفتار کرلیا جس کی شناخت مینگلور کے رہائشی محمد ناظم (25) کی حیثیت سے کی گئی ہے۔
ناظم کو عدالت میں پیش کرنے کے بعد جوڈیشیل کسٹڈی میں بھیج دیا گیاہے۔ اس سے قبل بھٹکل کے محمد اقبال شیخ، بنٹوال کے رہنے والے محمد سراج اور مینگلور کے رہنے والے مشرف کو گرفتار کیا گیا تھا۔
ذرائع کی مانیں تو گرفتار شدہ چاروں ملزموں کو بھٹکل جے ایم ایف سی عدالت کے سامنے حاضر کرنے کے بعد جوڈیشیل کسٹڈی میں کاروار جیل بھیج دیا گیا ہے۔
واضح رہے کہ سنیچر 19/اکتوبر کو عفان جبالی کی نعش ہائی وے پر واقع ہوٹل شانبھاگ کے ایک کمرے میں پائی گئی تھی،ا س تعلق سے عفان کے بھائی نبیل نے بتایا تھا کہ اُس کی نعش ایک تھیلے میں بند کرکے رکھی گئی تھی اور نعش کے ہاتھ اور پاوں بندھے ہوئے تھے۔ واردات کے بعد نبیل جب ہوٹل پہنچا تھا تو اُس کی ملاقات اقبال شیخ سے ہوئی تھی جس نے اُسے بتایا تھا کہ مقتول عفان ہوٹل میں نہیں بلکہ وہ یہاں سے بھاگ چکا ہے، اس دوران ہوٹل کے دوسرے کمرے سے نبیل نے پانچ لوگوں کو بھاگتے ہوئے دیکھا تھا، بعد میں نبیل اپنے دوستوں کی مدد سے اقبال کو اُسی وقت فرار ہونے کے دوران پکڑ لیا تھا جس کی اچھی خبر لینے کے بعد اُسے پولس کے حوالے کیا گیا تھا، نبیل کی ہی شکایت کے بعد اورسی سی ٹی وی فوٹیج کی بنیاد پر پولس نے عفان جبالی کے قتل میں چھ لوگوں کے خلاف معاملات درج کئے تھے۔ اس تعلق سے اب تک چار لوگوں کو پولس گرفتار کرنے میں کامیاب ہوچکی ہے، مزید دو کی تلاش جاری ہے۔ ضلع اُترکنڑا کے ایس پی شیو پرکاش کی نگرانی میں بھٹکل اسسٹنٹ ایس پی نکھل کی قیادت میں بھٹکل پولس کی پوری ٹیم اس معاملے کو حل کرنے میں جُٹی ہوئی ہے۔