بھٹکل عفان جبالی قتل کیس؛ مینگلور سے ایک اور ملزم گرفتار؛ پولس کو تین مزید لوگوں کی تلاش
بھٹکل 25/اکتوبر(ایس او نیوز) گذشتہ سنیچر کو ہوئے عفان جبالی قتل کے معاملے میں بھٹکل پولس آج جمعہ کی شب کو ایک اور ملزم کو گرفتار کرنے میں کامیاب ہوگئی ہے جس کی شناخت مینگلور کے رہنے والے مشرف کی حیثیت سے کی گئی ہے۔ اس کے ساتھ ہی گرفتارشدگان کی تعداد بڑھ کر تین ہوگئی ہے۔ ذرائع سے ملی اطلاع کے مطابق مشرف کو کل سنیچر کے روز عدالت کے روبرو پیش کئے جانے کی توقع ہے۔
خیال رہے کہ گذشتہ سنیچر کو قلب شہر میں واقع ایک لاڈج میں موگلی ہونڈا کے رہنے والے محمد عفان جبالی کا قتل کیا گیا تھا، جس میں جملہ چھ لوگوں کے ملوث ہونے کی بات ایف آر آئی میں درج کی گئی تھی۔ واردات کے فوری بعد ہزاروں کی تعداد میں لوگ ہوٹل کے باہر جمع ہوگئے تھے جس کے دوران ایک شخص کو جائے وقوع سے اُسی وقت گرفتار کرلیا گیا تھا جبکہ قتل میں مبینہ طور پر ملوث پانچ لوگ ضلع جنوبی کینرا کے بتائے گئے تھے، واردات انجام دینے کے بعد فرار ہوگئے تھے۔ اس ضمن میں کل جمعرات کو ایک شخص کو بنٹوال سے گرفتار کیا گیا تھا، جبکہ آج مینگلور سے ایک ملزم کو گرفتار کیا گیا ہے۔ اس قتل سے مکمل طور پر پردہ ہٹانے کے لئے پولس کو مزید تین لوگوں کی تلاش ہے جنکے تعلق سے خبر ملی ہے کہ پولس کی تین الگ الگ ٹیموں کو تین الگ الگ مقامات پر روانہ کیا گیا ہے۔
