بھٹکل اے سی نے سیاسی پارٹیوں کو سونپی نظر ثانی شدہ ووٹرلسٹ ؛ لسٹ سے 2740 ناموں کا اخراج؛ 1799 نئے نام شامل
بھٹکل 24 / جنوری (ایس او نیوز) بھٹکل کی اسسٹنٹ کمشنر(اے سی) نینا نے لوک سبھا حلقہ کی نظر ثانی شدہ فائنل ووٹرلسٹ سیاسی پارٹیوں کے حوالے کی ۔ اس موقع پر مختلف سیاسی پارٹیوں کے نمائندوں کے ساتھ بات چیت کرتے ہوئے انہوں نے بتایا کہ الیکشن کمیشن آف انڈیا کی ہدایات کے مطابق قطعی ووٹر لسٹ جاری کر دی گئی ہے ۔ بھٹکل حلقہ کی فہرست میں جملہ 2,25,128 ووٹرس ہیں جن میں 1,14,053 مرد اور 1,11,075 خواتین شامل ہیں ۔ خصوصی نظر ثانی کے دوران ووٹر لسٹ سے 2,740 نام خارج ہوئے ہیں اور 4,434 ناموں میں ترمیم ہوئی ہے جبکہ 1,799 ووٹرس کے نام شامل کیے گئے ہیں ، جنہیں ڈاک کے ذریعے ووٹر شناختی کارڈس روانہ کیے گئے ہیں ۔
اے سی نے بتایا کہ ووٹر لسٹ پر خصوصی نظر ثانی کے دوران بوتھ لیول پر افسران نے گھر گھر جا کر فوت ہونے یا علاقے سے دوسری جگہ منتقل ہونے والے یا پھر نئے نام شامل کرنے کے سلسلے میں جانکاری حاصل کی ۔ مکمل جائزہ اور ضوابط کے مطابق اس کی تصدیق کے بعد ووٹر لسٹ کو قطعی شکل دی گئی ہے ۔
اب اگر اس قطعی فہرست میں بھی نام ، پتہ وغیرہ کے سلسلے میں کوئی تبدیلی، ترمیم و تنسیخ کرنا ہو تو آن لائن پر فارم 8 بھرتی کیا جا سکتا ہے یا پھر براہ راست محکمہ سے رابطہ قائم کر سکتے ہیں ۔
اے سی نینا نے کہا کہ ووٹر فہرست سے متعلق کسی بھی کارروائی کے لئے ووٹروں کو اب سرکاری دفتروں کے چکر کاٹنے کی ضرورت نہیں ہے ۔ بلکہ وہ خود ہی ویب پورٹل voters.eci.gov.in ، ووٹر ہیلپ لائن موبائل ایپ یا 1950 voter hel[pline کے ذریعے مناسب اور ضروری فارم بھرتی کر سکتے ہیں ۔