بھٹکل، 22/جولائی(ایس او نیوز/ایجنسی) اُترکنڑا کے اندورنی علاقوں اورملناڈ سمیت ریاست کے12اضلاع میں موسلا دھاربارش سے عام زندگی پوری طرح ٹھپ پڑگئی ہے۔ جبکہ ذرائع سے ملی اطلاع کے مطابق چک منگلورو کے موڈیگیرے داداہلی میں دیوما(63) نامی عورت ہیماوتی ندی میں گرنے سے ہلاک ہوگئی ہے۔

ذرائع سے ملی اطلاع کے مطابق چک منگلورو میں ہو رہی موسلادھار بارش کی وجہ سے آگمبے میں تعلیمی اداروں کو چھٹی کا اعلان کر دیا گیا ہے۔ بیلگاوی  ضلع اور مہاراشٹرا کے سرحدی علاقوں میں بھی بھاری بارش ہوئی ہے۔ کرشنا،ملا پرابھا سمیت اس علاقہ کی کئی ندیاں زیر آب ہو چکی ہیں۔ خانہ پور تعلقہ میں ہوئی موسلا دھار بارش کی وجہ سے ملا پرابھا ندی پر باندھے12سے زیادہ پلوں پر سے پانی بہنے لگا ہے۔خانہ پورتعلقہ کے 50دیہات کا رابطہ ٹوٹ گیا ہے،ملا پرابھا ندی کے متصل مندر میں بڑی مقدار میں پانی داخل ہونے کی بھی خبر موصول ہوئی ہے۔

شیموگہ اورچکمنگلورومیں ہورہی بھاری بارش کی وجہ سے تُنگا ندی خطرے کے نشان سے اوپر بہنے لگی ہے۔ شیرینگری کا ایک مندربھی پانی میں ڈوبنے کی خبر ہے۔ باگل کوٹ ضلع کے جمکھنڈ تعلقہ میں موسلادھار بارش کی وجہ سے مکان کی چھت زمین بوس ہو گئی ہے،جس کے نتیجہ میں چارافراد زخمی ہوئے ہیں۔ دھارواڑ تعلقہ کے بوگور میں سرکاری اسکول کا سلیب گرنے سے3طلبا زخمی ہو ئے ہیں۔

شمالی کنڑا ضلع کے یلا پور میں ہوئی بھاری بارش سے یہاں کے سرکاری اسکول کی دیوار ز مین بوس ہو گئی، لیکن اس سے کوئی جانی نقصان نہیں ہوا۔ موسلادھار بارش کی وجہ سے ہاسن کے دونیگل سے قریب شرڈی گھاٹ میں قومی شاہراہ میں زمین کھسکنے سے گاڑیوں کی چہل پہل تھم گئی تھی جس کے بعد ٹپر لاریوں کے ذریعے مٹی ہٹائی جارہی ہے۔ مینگلورو اور شیموگہ قومی شاہراہ کے شنکر پور میں سڑک میں دراڑ پڑنے خبر ہے۔

 مینگلورو، بیلاری، شیموگہ اضلاع کی حدود میں تیز ہواؤں کے ساتھ ہوئی بارش کی وجہ سے کئی درخت زمین بوس ہو چکے ہیں،اس کے علاوہ 8 مکانوں کو نقصان پہنچا ہے۔ جنوبی کنڑا، اڈپی، ہاویری، کورگ اور گدگ اضلاع میں موسلادھار بارش کی رپورٹیں ملی ہیں۔

محکمہ موسمیات کے مطابق ریاست کے مختلف اضلاع میں مزید 3دنوں تک بھاری بارش کے امکانات ہیں۔