بنٹوال:ہائی وے پر واقع 5دکانوں میں شٹرس کے تالے توڑ کر انجام دی گئی چوری کی وارداتیں
بنٹوال 30/ستمبر (ایس او نیوز) اڈیاناڈکا نامی علاقے ہائی وے کے کنارے پر واقع 5دکانوں کے شٹرس کے تالے توڑکر چوری کی وارداتیں انجام دی گئی ہیں، جس میں نقدی، کمپیوٹر مانیٹرکے علاوہ سگریٹ کے بنڈلوں پر ہاتھ صاف کیا گیا ہے۔
پولیس اسٹیشن میں درج شکایت کے مطابق واسودیوا نائیک نامی شخص کی دکان سے لٹیرے 60ہزار روپے نقداور 30ہزار روپے مالیت کے سگریٹوں کے علاوہ سی سی کیمرے سے منسلک کمپیوٹر مانیٹر بھی اپنے ساتھ لے گئے ہیں۔ دیوانندا شینوئی کی دکان سے صرف 500روپے نقد اڑا لیے گئے ہیں، جبکہ شینوئی کی دکان کے سامنے والے اسٹوڈیو سے تقریباً 10ہزار روپے چرائے گئے ہیں۔رادھا کرشنا نامی شخص کی دکان کا قفل توڑنے کے بعد چوروں نے دکان کے اندر نقد رقم کی تلاش میں ٹیبل کے خانے میں موجود کاغذات بکھیر دئے، مگر وہاں سے وہ لوگ خالی ہاتھ لوٹ گئے،جبکہ روہتاشوا نامی شخص کی دکان سے 10ہزار روپے نقدی اڑانے میں وہ کامیاب ہوگئے ہیں۔
ایک ہی رات میں سلسلہ وار چوری کی خبر ملنے پر پولیس افسران نے فنگر پرنٹ ماہرین اور ڈاگ اسکواڈ کے ساتھ متعلقہ دکانوں پر پہنچ کر معائنہ کیااور تحقیقات شروع کردی ہے۔پولیس کا کہنا ہے کہ شہر کے ایک سی سی کیمرے میں ایک چورکی مشکوک حالت میں گھومنے کی تصویر قید ہوگئی ہے جس کی بنیاد پر مزید چوروں کے تعلق سے سراغ لگانا اس کے لئے آسان ہوجا ئے گا۔
ایڈیشنل سپرنٹنڈنٹ آف پولیس ڈاکٹر وکرم امٹے، اسسٹنٹ سپرنٹنڈنٹ آف پولیس سیداللہ ادواوت، سرکل پولیس انسپکٹر ٹی ڈی ناگراج نے جائے واردات پر پہنچ کر معائنہ کیا۔