بھٹکل: ترن مکّی نیشنل ہائی وے پر بس اور ٹمپو کی ٹکر؛ 20 سے زائد زخمی
بھٹکل یکم اکتوبر (ایس او نیوز) کاروار سے بھٹکل جانے کے دوران تیز رفتار بس ، مسافر بردار ٹمپو سے ٹکراگئی جس کے نتیجے میں 20 سے زائد افراد زخمی ہوگئے۔ حادثہ سنیچر صبح مرڈیشور اور شرالی کے درمیان ترن مکّی چرچ کے قریب نیشنل ہائی وے 66 پر پیش آیا۔ تمام زخمیوں کو بھٹکل سرکاری اسپتال میں داخل کیا گیا ہے۔
بتایا گیا ہے کہ مسافر بردار ٹمپو ہوناور سے بھٹکل جارہی تھی، جس میں زیادہ تر اسکول ٹیچرس سوارتھیں جو شرالی ، چتراپور میں منعقدہ ایک پروگرام میں شریک ہونے کے لئے جارہی تھیں۔ اس دوران کاروار سے بھٹکل ہوتے ہوئے مینگلور جانے والی والووو بس نے پیچھے سے ٹمپو کو ٹکرماردیا۔ بس پر سوار تمام مسافر محفوظ رہ گئے، البتہ ٹمپو پر سوار مسافروں کو چوٹیں آئی ہیں۔
پانچ زخمیوں کو بھٹکل سرکاری اسپتال میں ابتدائی طبی امداد فراہم کرنے کے بعد زائد علاج کے لئے کنداپور یا مینگلور اسپتال جانے کی صلاح دی گئی ہے۔دیگر زخمیوں کی بھٹکل اسپتال میں ہی مرہم پٹی کرائی گئی ہے۔
زخمیوں کی شناخت وسنتی، چندرو گوڈا، للیتا، وندنا، سوچیترا، بھاگوتی، وینا کامتھ، کوسوما، زُبیدہ، منجوناتھ، نورالنساء، لتا، کویتا، بھومیکا، امبیکا، اشرف النساء، انیتا اور لکشمی کی حیثیت سے کی گئی ہے۔
یاد رہے کہ کاروار سے بھٹکل جانے والی ٹمپو اور بھٹکل سے مینگلور جانے والی پرائیویٹ بسیں، اکثر ہائی ویز کنارے اچانک رُک جاتی ہیں، جس سے پیچھے سے آنے والی سواریوں بالخصوص بائک سواروں کو اپنے گاڑی پر قابو پانا مشکل ہوجاتا ہے۔ عینی شاہدین نے بتایا کہ حادثے کا شکار ٹمپو بھی ہائی وے کنارے پر رُکتے رُکتے جارہی تھی، جیسے ہی یہ ٹمپو ترن مکّی کی طرف رُکنے کی تیاری میں تھی، اُسی دوران سرکاری بس جو ٹمپو کو اوورٹیک کرنے کی فراغ میں تھا، ٹمپو کے اچانک رُکنے کی وجہ سے اُس سے ٹکراگیا۔
حادثے میں بس کے اگلے حصے کو شدید نقصان پہنچا ہے، اسی طرح ٹمپو کو بھی کافی نقصان پہنچا ہے۔
اطلاع ملتے ہی مرڈیشور پولس کے اہلکار جائے وقوع پر پہنچے اور زخمیوں کو اسپتال پہنچانے کے بعد ٹریفک نظام کو درست کیا۔
مرڈیشور پولس تھانہ میں معاملہ درج کیا گیا ہے۔
