بھٹکل 20/جولائی (ایس او نیوز) قومی تعلیمی ادارہ انجمن حامئی مسلمین بھٹکل کے عام انتخابات اگلے سال 19 جنوری کو ہوں گے جس کے لئے آج سنیچر کو ہوئی انتظامیہ میٹنگ میں الیکشن کمشنر کا انتخاب عمل میں آیا ہے۔ اس بات کی تصدیق انجمن کے جنرل سکریٹری جناب صدیق اسماعیل نے کی ہے۔ انہوں نے بتایا کہ آج کی میٹنگ میں جناب اسحاق شاہ بندری آٹھ کے مقابلے 22 ووٹ حاصل کرتے ہوئے الیکشن کمشنر منتخب ہوئے ہیں اور دستور کے مطابق چھ ماہ بعد انجمن کے انتخابات ہوں گے۔
ذرائع سے ملی اطلاع کے مطابق الیکشن کمشنر کے انتخاب کے بعد اگلی میٹنگ میں تحلیل ہونے والی انتظامیہ میں سے دس اراکین کا انتخاب ہوگا۔
بتایا گیا ہے کہ آج انجمن انتظامیہ کی میٹنگ میں جملہ 30 اراکین شریک ہوئے تھے، الیکشن کمشنر کے لئے تین لوگوں کے نام پیش ہوئے جس میں سے ایک کا نام واپس لیا گیا اس طرح دو اراکین میں سے کسی ایک کو منتخب کرنے ووٹنگ کرائی گئی اور جناب اسحاق شاہ بندری صاحب 22 ووٹ حاصل کرتے ہوئے الیکشن کمشنر منتخب ہوئے۔
ذرائع کے مطابق انجمن کی انتظامیہ 85 اراکین پر مشتمل ہے جس میں قریب آدھے لوگ بیرون بھٹکل مقیم رہتے ہیں۔
یاد رہے کہ 1919 سے قائم انجمن کے ماتحت مونٹیسری، پرائمری اور ہائی اسکول سے لے کر گریجویٹ، انجینرنگ، بی ایڈ، بی سی اے اوربی بی اے وغیرہ تک تعلیم دی جاتی ہے۔اور یہ ادارہ اپنے سوسال مکمل کرچکا ہے یہ بھی یاد رہے کہ انجمن کی صد سالہ تقریبات کا دور بھی جاری ہے۔