بھٹکل: وزیر اعلیٰ سدارامیا کے خلاف اننت کمارہیگڈے کی بد زبانی - کیا کہتی ہے اتر کنڑا اراکین اسمبلی کی خاموشی ؟!
بھٹکل 16 / جنوری (ایس او نیوز) اتر کنڑا کے رکن پارلیمان اننت کمار ہیگڈے نے ریاستی وزیر اعلیٰ سدا رامیا کے خلاف کمٹہ کے ایک اجلاس میں جو بد زبانی کی اور توہین آمیز فقرے کسے اس پر کانگریسی لیڈروں کی طرف سے بڑے پیمانے پر رد عمل ظاہر کیا جا رہا ہے ۔ لیکن تعجب خیز طور پر اتر کنڑا کے چاروں اراکین اسمبلی نے اس پر مکمل خاموشی اختیار کر رکھی ہے جس پر سیاسی حلقوں میں چہ میگوئیاں ہو رہی ہیں ۔
رکن پارلیمان اننت کمار ہیگڈے اس وقت ایودھیا میں نو تعمیر شدہ رام مندر میں مورتی کی تنصیب کے حوالے سے ضلع بھر میں پارٹی کارکنان کے اجلاس منعقد کرنے اور ان پرگراموں میں اشتعال انگیز اور منافرت بھرے بیانات کے ذریعے پارلیمانی الیکشن میں ٹکٹ کے لئے پارٹی پر دباو بنانے میں مصروف ہیں، اسی سلسلے کی کڑی کے طور پر اننت کمار ہیگڈے نے کمٹہ کے اجلاس میں سدا رامیا کے خلاف توہین آمیز لہجہ استعمال کیا تھا جس پر ہوم منسٹر ڈاکٹر جی پرمیشور، شیوراج تنگڈگی، جگدیش شٹر، مدھو بنگارپا سمیت کانگریس کی ریاستی اعلیٰ لیڈر شپ نے سخت رد عمل کا اظہار کیا جبکہ کانگریسی کارکنان نے بنگلور میں اننت کمار ہیگڈے کے خلاف احتجاجی مظاہرے بھی کیے ۔
البتہ تعجب خیز طور پر اتر کنڑا ضلع میں کانگریس کے چار اراکین اسمبلی رہنے کے باوجود ریاستی وزیر اعلیٰ سدا رامیا کے خلاف اننت کمار ہیگڈے کی بد زبانی اور ناشائستہ فقروں پر کوئی احتجاجی رد عمل یا مذمتی بیان سامنے نہیں آیا ہے ۔ اس سے ایک طرف کانگریس کارکنان میں بے اطمینانی دیکھی جا رہی ہے تو دوسری طرف سیاسی حلقوں میں اس خاموشی کو کچھ الگ ہی رنگ دینے کی کوشش کی جا رہی ہے ۔
کچھ لوگ اٹکلیں لگا رہے ہیں کہ سابقہ اسمبلی الیکشن میں اننت کمار ہیگڈے نے سیاسی سرگرمیوں سے اپنے آپ کو دور رکھتے ہوئے بالواسطہ طور پر کانگریسی امیدواروں کو جیتنے کا جو موقع فراہم کیا تھا اسی کی وجہ سے اب یہ کانگریسی اراکین اسمبلی اننت کمار ہیگڈے کے تعلق سے اپنی زبان بند رکھنے پر مجبور ہیں ۔
یہ افواہیں بھی گردش کر رہی ہیں کہ اگر پارلیمانی الیکشن میں اننت کمار ہیگڈے کو بی جے پی کا ٹکٹ ملتا ہے تو اس بات کی بھی گنجائش نکل سکتی ہے کہ ضلع کے کانگریسی اراکین اسمبلی اننت کمار ہیگڈے کی جیت میں معاون بن سکتے ہیں ۔ اس پر کوئی حتمی رائے قائم نہیں کی جا سکتی مگر موجودہ حالات میں ضلع کے اراکین اسمبلی کی طرف سے اننت کمار ہیگڈے کے خلاف زبان بند رکھی جا رہی ہے ، اس سے یقیناً دال میں کچھ کالا ہونے کی بات ضرور محسوس ہو رہی ہے ۔
