ابوبکر ماکڑے کےزائد علاج کے لئے ریاض میں اہم میٹنگ کا انعقاد؛ حاضرین نے دل کھول کر کی مالی مدد؛ مزید مدد کی اپیل
بھٹکل 7 / فروری (ایس او نیوز) بھٹکل حنیف آباد کے داماد اور پڑوسی علاقہ شیرور کے رہائشی ابوبکر ماکڑے کوبنگلور اسپتال شفٹ کرکے زائد علاج کرنے کے تعلق سے ریاض میں ڈاکٹر وسیم مانی اور ڈاکٹر ظہیر کولا نے ایک خصوصی میٹنگ کا انعقاد کیا جس میں ریاض میں مقیم بھٹکل، مرڈیشور، منکی و دیگر علاقوں کے ذمہ داروں نے بڑھ چڑھ کر حصہ لیا۔
انسانیت کی خدمت کا جذبہ جن کے دلوں میں ہوتا ہے اور جولوگ اللہ کی رضا کے لئے اور خالص نیک نیتی اور خلوص دل کے ساتھ کام کرتے ہیں، اللہ تعالیٰ کی مدد نازل ہوکر رہتی ہے، اس کی تازہ مثال ابوبکر ماکڑے کو انڈیا روانہ کرنے کے سلسلے میں کی گئی کوششیں ہیں، ان باتوں کا اظہارشہباز منّا نے کیا، انہوں نے کہا کہ قریب ایک کروڑ کا اسپتال بل ادا کرنے کے تعلق سے ہم تمام لوگ بے حد فکرمند تھے، اس کے لئے بھاگ دوڑ کررہے تھے، مگر چونکہ نیت صاف تھی، اللہ نے غیبی مدد فرمائی اور اسپتال انتظامیہ نے ہی خود سامنے آکر پورا کا پورا بل معاف کردیا۔ اب ہمیں اس مریض کو بنگلور اسپتال میں شفٹ کرنا ہے، جہاں علاج کے لئے کم و بیش 20 لاکھ خرچہ آنے کا اندیشہ ہے، اس مناسبت سے ہمیں اس کے علاج کے لئے رقم اکھٹی کرنی ہے، جس کے لئے اس میٹنگ کا انعقاد کیا گیا ہے۔ انہوں نے تمام ذمہ داران سے درخواست کی کہ وہ اس کاذ کے لئے اپنی جانب سے دل کھول کر مالی تعائون فرمائیں۔
ریاض کے رماد ہوٹل میں رات قریب دس بجے میٹنگ کا آغاز مدرسہ کے طالب العلم عبداللہ مشتاق کوچوباپو کی تلاوت کلام پاک سے ہوا، اسپتال میں نو ماہ سے ایڈمٹ ابوبکر ماکڑے کو انڈیا روانہ کرنے کے سلسلے میں سرگرم ہوکر کام کرنے والے ڈاکٹر ظہیر کولا نے افتتاحی کلمات پیش کئے۔ شہباز منا نے پروگرام کی نظامت کی۔
میٹنگ میں ڈاکٹر ظہیر نے ابوبکر ماکڑے کو انڈیا روانہ کرنے کے تعلق سے کی گئی کوششوں کا مختصراً خاکہ پیش کیا، جبکہ شہباز منّا نے اب تک کی گئی تمام کاروائیوں کی تفصیلات پیش کیں۔ ڈاکٹر وسیم مانی جونہایت سرگرم ہوکر متعلقہ مریض کو انڈیا روانہ کرنے کے لئے ابتدا سے ہی جُڑے ہوئے تھے اور بنگلور پہنچ کر منی پال اسپتال میں نو ڈاکٹروں پر مشتمل ایک ٹیم ترتیب دے کر انہیں ابوبکر ماکڑے کے علاج کے لئے ضروری ہدایات دے کر واپس لوٹے ہیں، نے مریض ابوبکر کی حالت کے تعلق سے معلومات فراہم کی، اس سلسلے میں انہوں نے ایک وڈیو کلپ کے ذریعے اسکرین پر پرزینٹیشن بھی پیش کیا جس میں تمام ممبران سے مدد کی درخواست کی گئی تھی۔
مرڈیشورمسلم جماعت ریاض کے صدر اشفاق کوٹیشور نے ڈاکٹر وسیم مانی، ڈاکٹر ظہیر کولا اور ان کے رفقائ کےذریعے انجام دی گئی خدمات کو سراہتے ہوئے اس بات پر بے حد خوشی کا اظہار کیا کہ جتنی فکرمندی کے ساتھ ایک مریض کو انڈیا روانہ کرنے کے سلسلے میں جو کام کیا گیا ہے وہ نہایت سراہنا کرنے کے قابل ہے۔ انہوں نے آئندہ بھی اسی طرح تمام لوگوں کو مل جل کر کام کرنے اور ایک دوسرے کی مدد کے لئے آگے آنے کی ضرورت پر زور دیا۔ بھٹکل مسلم جماعت ریاض کے صدر نجف خومی، منکی مسلم جماعت ریاض کے صدر الطاف کٹنگری، بھٹکل مسلم جماعت ریاض کے سرپرست عبدالعلیم قاضیا ودیگر ذمہ داران نے بھی اس موقع پر خدمات انجام دینے والوں کی بے حد تعریف کی اور اُن کے کام کی سراہنا کرتے ہوئے یقین دلایا کہ ابوبکر کے ساتھ ساتھ دیگر معاملات میں بھی کسی کی مدد کرنی ہو تو ہم سبھی حضرات اپنی جانب سے ہرممکن تعائون دیں گے۔
میٹنگ میں شریک سبھی شرکائ نے دل کھول کراپنی جانب سے عطیہ پیش کیا، بالخصوص مرڈیشور کے ذمہ داران نے ابوبکر ماکڑے کے علاج کے لئے خطیر رقم پیش کیں۔
ڈاکٹر ظہیر کولا نے اس دوران جناب یونس قاضیا ، جناب ابوبکر مختصر، کیرالہ کے سماجی ورکر شہاب، اسپتال نرس نوریّہ و دیگر احباب بالخصوص شہباز منا، عفان منا، استیاق آرمار، فوزان بڈچول وغیرہ کا بھی بھرپور شکریہ ادا کیا جن میں کچھ لوگوں نے ہمت بندھائی اور کام کرنے میں ہاتھ بٹھایا تو کچھ نے ہر ہر قدم پر ساتھ نبھایا۔ میٹنگ میں ساحل آن لائن کی بھی خدمات کا تذکرہ کرتے ہوئے بھرپور شکریہ ادا کیا گیا۔
مولوی ریان برماور ندوی کے دعائیہ کلمات اور عفان منا کے کلمہ تشکر پر رات قریب 11:30 بجے میٹنگ کامیابی کے ساتھ اختتام کو پہنچی۔
ساحل آن لائن سے فون پر بات کرتے ہوئے ڈاکٹر وسیم مانی نےبتایا کہ ابوبکر ماکڑے کو جمعہ کے دن بنگلور اسپتال میں شفٹ کرنے کا منصوبہ ہے، جہاں ماہر ڈاکٹروں کی خدمات حاصل کی گئی ہیں۔ اس تعلق سے ڈاکٹر ظہیر کولا نے بتایا کہ بنگلور اسپتال میں علاج کے مکمل اخراجات کے لئے وہ گلف کی تمام جماعتوں کو درخواست روانہ کررہے ہیں تاکہ آگے چل کر علاج کے تعلق سے کسی بھی قسم کی رکائوٹ نہ آنے پائے۔ میٹنگ کے تعلق سے ڈاکٹر ظہیر کولا نے بتایا کہ میٹنگ اُمید سے زیادہ کامیاب رہی، اُمید سے زیادہ لوگوں نے حاضری دی اورمیٹنگ میں خطیر رقم جمع کی گئی۔ انہوں نے بتایا کہ ہر ایک نے بھرپور ساتھ دیا ہے اور وہ تمام لوگوں کےنہایت شکرگذار ہیں۔