سرسی 22/ جنوری (ایس او نیوز)سرسی سب ڈیویژن پولیس نے نیشنل روڈ سیفٹی ویک کے دوران ٹریفک قوانین کی پابندی نہ کرنے والوں کے خلاف خصوصی مہم چلائی جس کے تحت ایک ہی دن میں 1.38 لاکھ روپے جرمانہ وصول کیا گیا۔
پولیس ذرائع کے مطابق اس مہم کے دوران گاڑی چلاتے ہوئے ہیلمیٹ نہ پہننے، گاڑی کے دستاویزات اپنے ساتھ نہ رکھنے، چار پہیہ گاڑیوں میں سیٹ بیلٹ کا استعمال نہ کرنے والے کے خلاف کارروائی شامل ہیں۔
ڈی وائی ایس پی روی ڈی نائک نے بتایا کہ آئندہ دو پہیہ گاڑیوں پر ہیلمیٹ نہ پہننے والوں کے خلاف سخت کارروائی کی جائے گی، اور ایسے لوگوں کے لائسنس رد کیے جائیں گے۔ کیونکہ پولیس کا مقصد جرمانہ وصول کرنا نہیں بلکہ حفاظتی نقطہ نگاہ سے قوانین کی پابندی کروانا ہے۔ ادھر جتنے حادثات ہورہے ہیں ان میں دیکھا گیا ہے کہ ہلاکت کا سبب اکثر ہیلمیٹ نہ پہننا ہے۔ اس لئے ایسی خلاف ورزی کرنے پر کارروائی جاری رہے گی۔