بھٹکل میں پیر کو کورونا کے 94 معاملات؛ ایک کی موت، بھٹکل میں مرنے والوں کی تعداد بڑھ کر ہوگئی 19
بھٹکل 17 مئی (ایس او نیوز) بھٹکل میں کورونا پوزیٹیو کے 94 معاملات پیر کو درج کئےگئے ہیں جبکہ ایک شخص کی موت واقع ہونے کی بات بھی ہیلتھ بلٹین میں دی گئی ہے۔ ذرائع کے مطابق مرنے والے کا تعلق حنیف آباد سے ہے۔ پتہ چلا ہے کہ دراصل حنیف آباد کے اس شخص کی اتوار کو موت واقع ہوئی تھی، مگر پیر کے ہیلتھ بلٹین میں اس کی موت کا تذکرہ درج کیا گیا ہے۔
بتاتے چلیں کہ گذشتہ ایک ماہ سے بھٹکل میں ہرروز دو یا تین لوگوں کی مرنے کی خبریں سوشیل میڈیا پر وائرل ہورہی ہیں اور اکثر کی موت کورونا سے ہونے کی باتیں بھی کی جارہی ہیں، مگر سرکاری ہیلتھ بلٹین کے تعلق سےعوام کا کہنا ہے کہ اس میں کورونا پوزیٹیو معاملات اور کورونا سے مرنے والوں کی صحیح تعداد نہیں دی جارہی ہے۔اس تعلق سے سرکاری ذرائع کا کہنا ہے کہ بھٹکل سرکاری اسپتال میں اگر موت ہوتی ہے تو اُس کا شمار ہی بھٹکل کے ہیلتھ بلٹین میں درج ہوتا ہے، البتہ دوسرے اضلاع یا دوسری جگہوں پر موت ہونے پراُس علاقہ کے بلٹین میں ہی اُس کا اندراج ہوتا ہے۔
سرکاری رپورٹ کے مطابق پیر کو پوزیٹیو آنے والے 94 مریضوں میں سات لوگوں کو سرکاری اسپتال میں داخل کیا گیا ہے جبکہ دیگر تمام مریضوں کو کورونا کی علامات نہ پائی جانے یا کم پائی جانے کی وجہ سے گھروں پر ہی کورنٹائن کرنے کی ہدایت دی گئی ہے۔ رپورٹ کے مطابق آج 65 لوگ کورونا سے صحت مندبھی ہوئے ہیں اس طرح کورونا کے دوسری لہر میں اب تک 974 لوگوں میں اب 381 معاملات ہی ایکٹیو ہیں، دیگر تمام لوگ صحت یاب ہوچکے ہیں۔جملہ 33 لوگ اسپتال میں ایڈمٹ ہیں بقیہ لوگوں کو گھروں پر ہی کورنٹائن کیا گیا ہے۔ سرکاری رپورٹ کے مطابق بھٹکل میں ایک شخص کی کورونا سے موت ہونے کے بعد جملہ مرنے والوں کی تعداد بڑھ کر 19 ہوگئی ہے۔