بھٹکل 29 اگست (ایس او نیوز)  پیشہ وارانہ کالجس میں داخلہ  لینے   کے لئے حکومت کی طرف سے جاری کردہ   CET  امتحانات سنیچر سے ریاست بھر کے مختلف امتحانی مراکز  میں جاری ہے،    آج اتوار دوسرے اور آخری  دن بھی   سکینڈ پی یو سی میں   کامیا ب ہونے والے طلبہ  سی ای ٹی  امتحانات میں شریک ہوئے۔

ہر سال  سی ای ٹی امتحان کے لئے بھٹکل کے طلبہ کو کمٹہ جانا پڑتا تھا مگر گذشتہ سال سے  بھٹکل انجمن کالج میں ہی    سی ای ٹی  امتحانات منعقد ہورہے ہیں جس کے لئے  ریاستی محکمہ تعلیم کی جانب سے ضرور ی سہولیات فراہم کی گئی ہیں۔ 

انجمن پی یو کالج کے پرنسپال جناب محمد یوسف کولا نے بتایا کہ اس بار منعقدہ سی ای ٹی امتحانات میں   تعلقہ بھر سے 382 طلبہ  شریک ہوئے جن کے لئے انجمن کالج میں   16 کمرے مختص کئے گئے  تھے، کووڈ کے چلتے دو کمروں کو  کووڈ  سے متاثرہ یا مشتبہ طلبہ کے لئے   بھی  مخصوص کیا گیا تھا۔

دو سیٹنگ اسکواڈ اور  دو فلائنگ اسکواڈ کےذریعے امتحانات کی نگرانی   کی گئی ، ساتھ ساتھ  صاف شفاف طریقہ سے امتحان کے  انعقاد کے لئے  ایک چیف انسپکٹر، ایک اسسٹنٹ  انسپکٹر سمیت   ایک کسٹوڈین اور ایک نگراں کار کو مقرر کیاگیا تھا۔

سنچر کو بائیولوجی اور میتھس اور اتوار کو فزیکس اور کمیسٹری امتحان تھا۔ پہلے دن بائیولوجی امتحان کے لئے 382 میں سے  228 طلبہ شریک ہوئے ، چونکہ کافی طلبہ سکینڈ پی یو کے بعد انجنئرنگ کالجوں  کا رُخ کرتے ہیں اس لئے ایسے طلبہ  بائیولوجی امتحانات میں شریک نہیں ہوتے، اس وجہ سے بائیولوجی میں  154 طلبہ غیر حاضر رہے۔ میتھس میں  364 طلبہ،  فزیکس میں  370 اور کیمسٹری میں 369 طلبہ امتحان میں شریک ہوئے۔

امتحانات میں شریک ہونے والے طلبہ کے لئے ضروری قرار دیا گیا تھا کہ وہ ماسک پہن کر آئیں،  سماجی فاصلہ برقرار رکھیں، اسی طرح  امتحان گاہ جانے سے قبل ان کی جانچ بھی کی گئی ۔

سی ای ٹی کے نتائج 20 ستمبر کو ظاہر کئے جائیں گے  جبکہ کونسلنگ اکتوبر کے پہلے ہفتے  سے  شروع ہوں گے۔