ಭಟ್ಕಳ: ವೃತ್ತಿಪರ ಶಿಕ್ಷಣ ಪ್ರವೇಶಕ್ಕೆ ಸಂಬಂಧಿಸಿದಂತೆ ಶನಿವಾರ ಭಟ್ಕಳ ಅಂಜುಮನ್ ಪದವಿಪೂರ್ವ ಕಾಲೇಜಿನಲ್ಲಿ ನಡೆದ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ)ಗೆ ತಾಲೂಕಿನ ವಿವಿದೆಡೆಯಿಂದ ಒಟ್ಟೂ 382 ವಿದ್ಯಾರ್ಥಿಗಳು ಹಾಜರಾಗಿದ್ದಾರೆ.

ಅಂಜುಮನ್ ಕಾಲೇಜಿನ ಒಟ್ಟೂ 16 ಕೋಣೆಗಳಲ್ಲಿ ಪರೀಕ್ಷೆಗೆ ವ್ಯವಸ್ಥೆಯನ್ನು ಮಾಡಲಾಗಿತ್ತು. ಕೋವಿಡ್ ಶಂಕಿತರಿಗಾಗಿ 2 ಪ್ರತ್ಯೇಕ ಕೋಣೆಗಳನ್ನು ಮೀಸಲಾಗಿರಿಸಲಾಗಿತ್ತು. 2 ಸಿಟ್ಟಿಂಗ್ ಸ್ಕ್ವಾಡ್ ಮತ್ತು 2ಫ್ಲಾಯಿಂಗ್ ಸ್ಕ್ವಾಡ್‍ಗಳು ಪರೀಕ್ಷೆಯಲ್ಲಿ ಯಾವುದೇ ಗೊಂದಲ ಉಂಟಾಗದಂತೆ ಮೇಲುಸ್ತುವಾರಿ ವಹಿಸಿದ್ದವು. ಓರ್ವ ಮುಖ್ಯ ಪರೀಕ್ಷಾಧಿಕಾರಿ, ಇನ್ನೋರ್ವ ಸಹಾಯಕ ಪರೀಕ್ಷಾಧಿಕಾರಿ, ಓರ್ವ ಕಸ್ಟೋಡಿಯನ್‍ಗಳೊಂದಿಗೆ ಓರ್ವ ವೀಕ್ಷಕರನ್ನು ಪರೀಕ್ಷಾ ಕಾರ್ಯಕ್ಕಾಗಿ ನಿಯೋಜಿಸಲಾಗಿತ್ತು. ಪರೀಕ್ಷೆಗೆ ಬಂದ ವಿದ್ಯಾರ್ಥಿಗಳನ್ನು ಆರೋಗ್ಯ ಇಲಾಖೆಯ ಸಿಬ್ಬಂದಿಗಳು ಜ್ವರ ತಪಾಸಣೆ ಹಾಗೂ ಸೆನಿಟೈಸೇಶನ್‍ಗೆ ಒಳಪಡಿಸಿದರು. ಪರೀಕ್ಷಾ ಕೇಂದ್ರದ ಸುತ್ತ ಬಿಗಿಯಾದ ಪೊಲೀಸ್ ಬಂದೋಬಸ್ತ ಏರ್ಪಡಿಸಲಾಗಿತ್ತು, ರವಿವಾರವೂ ಪ್ರವೇಶ ಪರೀಕ್ಷೆ ನಡೆಯಲಿದೆ.