پی یو کامرس سال دوم کے امتحانات میں جنوبی کینرا کے 2طلبہ نے حاصل کیا ریاستی سطح پر پہلا رینک۔ دوسرا اور تیسرا مقام بھی جنوبی کینرا کو ملا
منگلورو15؍اپریل (ایس او نیوز) پی یو سی سال دوم کے نتائج کے اعلان کے بعد یہ بات سامنے آئی ہے کہ اس مرتبہ کامرس فیکلٹی میں جنوبی کینرا ضلع کے دو طلبہ نے 99.33% مارکس کے ساتھ ریاستی سطح کا پہلارینک حاصل کیا ہے۔
ان خوش نصیب طلبہ میں موڈبیدری کے آلواس پی یو کالج کی طالبہ اولویٹا انیلّا ڈیسوزا اور وٹلا الیکے ستیہ سائی لوک سیوا پی یو کالج کے طالب علم شری کرشنا شرما کے نام شامل ہیں۔ ان دونوں نے مجموعی طور پر 596مارکس حاصل کیے ہیں۔
اولویٹا کے بارے میں معلوم ہوا ہے کہ اس نے بزنس اسٹڈیز، اکاؤنٹس، بیسک میاتھس اور اسٹیٹی اسٹکس میں 100%مارکس حاصل کیے اور انگلش اورہندی میں اسے 98مارکس ملے۔اس کے علاوہ رینک کینراپی یوکالج منگلورو کی طالبہ شیریا شینئی نے 595(99.16)مارکس کے ساتھ ریاستی سطح کا دوسرا رینک حاصل کیا ہے۔ریاستی سطح کا تیسرا مقام سینٹ فلومینا کالج پتور کی طالبہ سواستک پی کے علاوہ مزید 6طلبہ نے حاصل کیا ہے جنہوں نے 594مارکس کے ساتھ 99% کا نشانہ پارکرلیا۔
طلبہ کی اس عمدہ کارکردگی پر کالج کے پرنسپال، اسٹاف اور عملے کی طرف سے بھرپور ستائش کی گئی ہے۔