بنگلورو ، 6/ جولائی (ایس او نیوز/ایجنسی) وزیرِ اعلیٰ ڈی کے شیوکمار نے اپوزیشن کی جانب سے جاری خصوصی ووٹر فہرست نظرثانی (SIR) کے عمل پر عائد کیے جانے والے الزامات کو مسترد کرتے ہوئے کہا ہے کہ "الزام تراشی کرنا اپوزیشن کا کام ہے، جبکہ حکومت کی ذمہ داری ہر شہری کو انصاف فراہم کرنا اور اس کے ووٹ کے حق کا تحفظ یقینی بنانا ہے۔"

وہ اتوار کے روز اے آئی سی سی کے صدر اور راجیہ سبھا میں قائدِ حزبِ اختلاف ملکارجن کھرگے کی رہائش گاہ کے باہر ذرائع ابلاغ سے گفتگو کر رہے تھے۔

صحافیوں نے جب اپوزیشن کے اس الزام کے بارے میں سوال کیا کہ خصوصی ووٹر فہرست نظرثانی (SIR) کا عمل گھر گھر جا کر انجام دینے کے بجائے ایک ہی مقام پر کیا جا رہا ہے، تو وزیرِ اعلیٰ نے کہا کہ حکومت کی اولین ترجیح یہ ہے کہ ہر اہل شہری کو انصاف ملے اور کوئی بھی شخص اپنے حقِ رائے دہی سے محروم نہ رہے۔

انہوں نے کہا کہ حکومت عوام سے مسلسل اپیل کر رہی ہے کہ وہ ووٹر فہرست میں اپنا نام برقرار رکھنے کے لیے ضروری کارروائی مکمل کریں تاکہ کسی بھی اہل ووٹر کا حق متاثر نہ ہو۔

وزیرِ اعلیٰ نے مزید کہا کہ اس معاملے پر ان کی جماعت بھی اپنا مؤقف رکھتی ہے اور اگر احتجاج کی ضرورت پیش آئی تو قانون، آئین اور جمہوری اقدار کے دائرے میں رہتے ہوئے ہی احتجاج کیا جائے گا۔

ڈی کے شیوکمار نے واضح کیا کہ حکومت شفاف اور منصفانہ انتخابی عمل کی پابند ہے اور ووٹ کے حق کے تحفظ کے لیے ہر ممکن اقدام جاری رکھے گی۔