کاروار13/جنوری (ایس او نیوز) گوا سے مرڈیشور جانے والی ایک تیز رفتار کار کاروار تعلقہ کے چنڈیا نیشنل ہائی وے کے کنارے واقع ایک درخت سے ٹکرانے کے نتیجے میں ایک شخص کی موقع پر موت واقع ہوگئی، جبکہ کار پر سوار دیگر دس لوگ شدید زخمی ہوگئے۔ حادثہ سنیچر کی اولین ساعتوں میں پیش آیا۔
ذرائع نے بتایا کہ ضلع کوپّل کے کوشٹگی کے رہنے والے 13 لوگ ایک کروزر کار پرسوار گوا کی سیر کو گئے تھے،سیر وتفریح کے بعد وہ گوا سے مرڈیشور جارہے تھے، جہاں سے اُن کا دھرمستھلا جانے کا بھی منصوبہ تھا، مگر غالباً نیند کے غلبے کی وجہ سے ڈرائیور کا گاڑی پر سے توازن کھو گیا اور کار سیدھے سڑک کنارے واقع ایک درخت سے کافی تیز رفتاری کے ساتھ ٹکراگئی۔
مرنے والے کی شناخت ننگپّا ہنومنتپّا (52) کی حیثیت سے کی گئی ہے۔
حادثے میں دس سے زائد لوگ زخمی ہوئے ہیں، جنہیں کاروار سرکاری اسپتال میں داخل کیا گیا ہے جبکہ کچھ لوگوں کو شدید چوٹ آنے کی وجہ سے ہبلی کیمس اسپتال منتقل کیا گیا ہے۔ زخمیوں کی شناخت وینکن گوڈا، حُسین آپّا، ہنومنتپا ، مدو کپّا، ہنومنتپا، چندرشیکھر، محمد رفیق، شیکھر، پرمود، امریش اور انجم کی حیثیت سے کی گئی ہے۔ زخمیوں میں زیادہ تر لوگ سرکاری ملازمت پر مامور ہیں۔